Parlamento lo trata terminacion di confiansa den minister Lopez Tromp diabierna

ORANJESTAD – Parlamento di Aruba ta trata e terminacion di confiansa den minister Marisol Lopez Tromp diabierna mainta trempan. Un yamada pa reunion pa Griffier Herman Hek ta mustra cu e reunion publico lo tuma lugar diabierna mainta 8’or. E reunion mes a keda pidi dia 26 di juli pa partido POR su dos miembronan, lider di fraccion Dellanire Maduro y Alvin Howell. E peticion a keda sostene pa lidernan di fraccion di MEP (Rocco Tjon) y RED (Ricardo Croes). Den e carta di peticion, Maduro y Howell ta papia di e impasse den e partido, hasta ora cu a inicia e periodo di mediacion. “Mirando e crisis di COVID-19, pais Aruba no por permiti su mes un situacion di ‘stancamento’ di gobierno di Aruba aworaki’, e firmantenan ta sigui bisa. Pesey ta pidi e reunion cu character di urgencia. A haci e peticion pa trata e reunion prome cu Lopez Tromp mester a biaha pa Hulanda. Pero esaki no a sosode. Esey kier men cu e reunion lo tuma lugar sin presencia di e mandatario. Den un encuesta cu noticiacla.com a publica awe, ta mustra cu 71% di esnan cu a participa, no kier pa Parlamento baha e mandatario. Wak e oproeping AKI.