Lo no limita e cantidad di turista pa luna cu ta yega Aruba

ORANJESTAD – Aruba no ta mira necesidad pa impone un limite riba e cantidad di turista cu ta yega Aruba. Asina minister di turismo Dangui Oduber a bisa noticiacla.com dialuna durante e briefing di COVID-19. Corsou a impone un limite (cap) pa e cantidad di turista cu por yega e isla, despues cu a habri e frontera bek. Esaki tabata 10 mil turista pa luna. Aruba a habri frontera dia 1 di juli, y a bisa e tempo ey cu no ta spera asina hopi turista. Pero a resulta cu e cantidad a surpasa tur expectativa. No obstante esey, Oduber no ta sinti cu mester pone e cap.

ARUBA POR HANDLE E SITUACION

E mandatario a admiti cu enberdad Aruba a surpasa e cantidad di turista cu a anticipa cu lo a haya den luna di juli. Aruba no a dicidi di pone un cap. “Den practica a resulta cu nos por a maneha e cantidad di bishitante cu nos a ricibi desde 1 di juli” Oduber a cuminsa na bisa. Pa loke ta e proyeccion di luna di augustus, ta mantene e maneho consecuente. “Nos no ta bay pone ningun cap” Oduber a sigui bisa. No tin ningun presion riba e capacidad di Aruba na hospital. Tur esnan cu a yega Aruba y test positivo, ta den isolacion y bon estado di salud. “Kier men cu nos maneho ta keda cu nos a dicidi pa habri frontera y ta keda maneha esaki te caminda cu nos ta sinti cu nos por” Oduber. Si ta sinti cu tin e necesidad cu mester tuma decision pa cap e cantidad di bishitante, lo haci esey na su debido tempo. Pero ainda no. Potret ta di archivo di noticiacla riba e prome dia cu a habri frontera pa Merca, dia 10 di juli ultimo.