Oduber: Aruba si no a dicidi pa cera frontera cu St Maarten

ORANJESTAD – Mientras cu Bonaire(a cera frontera)  y Corsou (conseho negativo) si a tuma paso contra St Maarten relaciona cu COVID-19, Aruba (ainda) no tin pensa di cera frontera cu St Maarten ni e otro islanan Corsou y Bonaire. Asina minister di turismo Dangui Oduber a bisa dialuna durante e briefing riba COVID-19.  “Na e momentonan aki Aruba no a tuma decision cu lo bay cera frontera ni cu St Maarten, ni cu Bonaire ni cu Corsou. Te ainda e decision ta pa mantene e frontera habri” Oduber a bisa. 

CORSOU Y BONAIRE

Mientras cu Corsou a impone medida contra St Maarten, esta den sentido cu a emiti un boletin negativo pa biaha pa e isla, y ora bolbe, mester bay den cuarentena obligatorio, Bonaire a cera frontera completo pa St Maarten. E medidanan ta mirando cu e situacion na St Maarten a bira ‘riesgoso’ cu 31 caso activo atrobe di COVID-19. St Maarten tin asina hopi caso, sin cu nan a habri frontera cu Merca, y ta parce cu e casonan cu nan tin ta contagion local.