Drs. Vicky Arens a bira e Director Nobo di Cas di Cultura

ORANJESTAD - E Hunta di Directiva di Stichting Schouwburg Aruba ta anuncia cu sra. Vicky Arens ta bira e proximo Director di Cas di Cultura. E procedura pa selecciona un director nobo pa Cas di Cultura a cana su caminda, na unda un comicion special di expertonan di Recursonan Humano, Sra Grace Maduro y Siegfried Dumphries y Jasper Fidler consultant den accountancy a conduci e charlanan di solicitacion. A base di nan conseho Directiva a tuma e decision pa cu e director nobo di Cas di Cultura.

Sra. Arens un tempo caba tabata director di Cas di Cultura durante 2005-2011 y a retira pa bai traha den e area cultural den sector publico. Entre otro ela traha desde e tempo ey na Departamento di Cultura Aruba na unda ela forma parti di e team di maneho pa un aña y mey, despues 'ter beschikking' como director interino na F.D.E.C. y mas recien como lider di proyecto pa Seyo Nacional di Artesania. Sinembargo recientemente sra. Arens a termina e curso di pedagogia y didactica na IPA exitosamente, den cual ela specialisa den CKV-Drama.

Como graduado den e estudio ‘Film and Performing Arts’, di universidad di Radboud na Nijmegen, e amor pa teatro y arte semper tabata y a keda den su sanger. Vicky ta bin Cas di Cultura bek cu hopi entusiasmo y cu un set di abilidadnan y ideanan nobo cu e tin pensa di eherce y ehecuta pa avance di nos teatro nacional. Hunta di directiva yama Vicky bon bini y ta desea su persona hopi exito cu su tarea di director di Cas di Cultura.