Evelyn Wever: Algo a pasa cu Hulanda a rabia masha hopi riba Aruba

ORANJESTAD – Algo a sosode e aña aki entre Aruba y Hulanda cu a pone Hulanda rabia masha hopi mes riba nos. Lider di MEP Evelyn Wever Croes no sa exactamente kico, pero e ‘algo’ aki ta algo suficiente grandi cu e relacion entre e dos paisnan aki a daña dje estado ey. “Sino nunca (minister) Plasterk lo a hinca den su cabez pa pone condicion riba mesa”. Ta algo no di e aña aki pero algun tempo caba cu e problema ta andando. Y e toelichting di e KB (koninklijk besluit) ultimo aki ta demostra esaki.

MENSAHE PA MIKE EMAN

Den su prome combersacion cu NoticiaCla desde e crisis constitucional, lider di partido MEP ta confirma na NoticiaCla tambe cu e ta dispuesto pa saca man na gobierno pa sali di e impasse actual. “Mi no ta yuda Mike Eman. Mi ta willing pa yuda Aruba ora cu ta trata autonomia di nos pais” Wever ta cum bisa. “Si mi tin cu bay Hulanda, hiba Mike Eman Hulanda pa papia cu e hulandesnan, mi ta willing pa hacie”. Unico forma pa Eman sali for di e cos aki ta pa ‘sali for di e tent , bay cas dal un bon comi, bisti su bachi y subi avion bay enfrenta e hulandesnan, ta pensamento di Wever.

E mensahe, segun Wever, ta simplemente cu MEP ta dispuesto pa yuda unda cu mester. “E (Mike Eman) sa cu e caminda ta habri. Nos semper ta dispuesto”. Wever ta sigura NoticiaCla cu no ta prome biaha cu ta saca man pa yuda e gabinete aki. Tempo di problema di Valero a ofrece, ora cu criminalidad a subi, a saca un man pa minister Dowers (di husticia) y asina Wever ta sigui bisa. “Pero nunca nan a tuma nos na serio”.

ACHTERBAN DI MEP

Pa loke ta e seguidornan di MEP, Wever a admiti cu tin cu den e partido heel ta bisa cu no tin motibo pa saca man pa Mike Eman. “ Y esey nan tin rason y mi no ta haci nada pa saca man pa Mike Eman tampoco” Wever ta sigura NoticiaCla. Pero como ser humano Wever kier wak Eman stop e wega aki tambe. “E no ta humano loke e ta haciendo cu su mes. Como lider di MEP, mi no ta sacando un man pa yuda Mike. Mi ta haciendo esaki pasobra nos tin cu lucha pa nos economia”.

AUTONOMIA

Wever ta considera cu ta gobierno actual a entrega autonomia di Aruba dia 7 di februari di e aña aki y ta un eror cu ministernan Eman y Yrausquin a comete. “Tur eror ta humano. Pero si bo keda sin coregi e eror, ta mas pio”.

CONTACTO CU HULANDA

E lider di partido heel ta admiti cu no tabatin contacto cu gobernantenan di Hulanda, pero si den e circulo di ambtenaar. “Cu ministernan mes mi no tabatin contacto” Wever ta bisa. E tin contacto cu directornan di departamentonan. E no ta hayando informacion si cu e kier pasobra nan no por dune e informacion.