No por stroba otro pa cobra pa colecta sushi

ORANJESTAD - No mester tin un guera of debate si gobierno ta bay mete cu companianan priva cu ta colectando sushi priva y/of industrial aworaki. Segun Camara di Comercio, cualkier discusion of debate no ta necesario pasobra tur cos ta claramente stipula. Pa mustra nan punto, Camara di Comercio ta cita parti di e 'memorie van toelichting' cu ta indica claramente cu gobierno ora cu a incorpora Serlimar, a bisa cu no ta bay stroba ningun compania cu ya ta haciendo esaki. Segun CdC, lo ta logico pa tuma posicion di e empresanan priva aki na cuenta awor tambe. Ningun ciudadano, cu tin e libre escogencia ken e ta contrata pa recoge sushi na su adres, sea di cas priva o empresa, lo aprecia di mester paga dos biaha pa un solo servicio, y esaki lo ta inhusto tambe. Por lo tanto, mester yega na un areglo con ta haci pa cada empresa cobra su cliente, y cu cada cliente ta ser cobra un biaha so. Claro cu mester percura pa ningun adres of punto di recoge sushi keda sin servicio di limpieza. Esey obligatoriamente lo trece cune, cu esnan cu no tin un contrato cu un compania priva, mester tin servicio di Serlimar y paga pa esey tambe. Esaki pa evita cu cualkier cas of negoshi ta keda sin servicio, cu tur consecuencia pa higiena publico. Segun Camara di Comercio, tumando na cuenta tur esaki, no por ta otro cu mester bin cu un sistema di registracion, unda tur usuario cu contrata un servicio priva mester ta conoci na Serlimar, pa evita cu nan ta ser cobra dos biaha. Tur demas adres y punto di recoge sushi obligatoriamente lo ser cobra pa Serlimar, garantisando asina cu ningun adres ta keda sin servicio di recoge sushi. Ta di spera cu pronto e partidonan envolvi lo por sinta na mesa y yega na un solucion den e direccion indica aki.