SMAC: Carnaval pa 2021 pa Aruba a keda cancela

ORANJESTAD – Stichting Maneho Aruba su Carnaval (SMAC) a oficialmente anuncia dialuna cu ta cancela carnaval pa 2021 na Aruba manera cu nos conoce. Lo haci algun tipo di celebracion carnavalesco na juli di otro aña pa recauda fondo. Pero no lo tin un temporada di carnaval manera cu nos conoce di algun luna, cuminsando na januari te maart. “Pa medio di e comunicado aki SMAC ta confirma cu ta berdad cu NO lo bay tin Carnaval na januari/februari 2021”, presidente di SMAC Jason Brown a anuncia den e comunicado di SMAC. 

MOTIBO

Segun SMAC, mirando e situacion actual di COVID-19 y cu Carnaval ta aglomeracion di hende y teniendo na cuenta e situacion financiero actual, no ta na su lugar pa organisa Carnaval na januari/februari 2021. SMAC conhuntamente cu Gruponan Uni, Stichting Musica y Raad van Toezicht a tuma e decision aki. SMAC hunto cu Raad van Toezicht a sinta na mesa cu Minister di Finanzas, Economia y Cultura/Gobierno pa sinti kico nan posicion ta pa cu Carnaval 2021. Gobierno tampoco ta mira Carnaval factibel na januari/februari 2021 y mester tene cuenta cu hopi factor entre otro esnan ya menciona aki riba.

WARM UP EVENT

Loke si lo haci na 2021 segun SMAC, ta cu Gruponan Uni y Stichting Musica lo organisa un asina yama "Carnival Warm Up Event" den e luna di juli. Dor di organisa algun actividad y paradanan ta yuda e gruponan di Carnaval pa crea un fondo chikito.

CONCEPTO NOBO

SMAC hunto cu Gruponan Uni y Stichting Musica a tuma e decision pa crea un concepto nobo pa cu nos prestigioso Carnaval 2022. E tres organisacion nan aki ta deliberando con pa crea e concepto nobo pa Carnaval sin ta serca di e temporada di Pasco, Dande, An?a Nobo y celebracion di Tres Rey. Hopi biaha ya ta cuminsa cu preparacion nan pa Carnaval caba den luna di november y december. E pensamento ta bay pa hala Carnaval pa un temporada mas stabil manera juli, augustus of september. Halando Carnaval for di e temporada ariba menciona ta duna tur hende mas espacio pa celebra e dianan di fiesta den tur trankilidad, nos lo no ta mara mas na e fecha di Diaranson di Shinishi y ta duna mas tempo pa prepara pa nos Carnaval.

Di e manera aki pues Carnaval lo conoce un etapa nobo y un temporada nobo. Por menciona tambe cu un di e beneficionan di organisa Carnaval na juli, augustus of september lo ta cu esaki ta cay p’afo di nos temporada di "high season turistico”, dunando e temporada nobo aki un boost positivo pa nos economia, cual nos isla mester mas di dje na e momento aki.

SMAC, Gruponan Uni y Stichting Musica ta invita pueblo di Aruba pa participa den e decision aki dor di manda bo idea nan pa nos via mail na: infosmacaruba@gmail.com. Asina cu nos tin mas informacion relaciona cu e temporada nobo di Carnaval na an?a 2022, nos lo trece tur informacion pa tur esnan pendiente di nos Dushi Carnaval.