Wever: A atende caso di Lopez di unico forma constitutional sin tranca gobernacion

ORANJESTAD – E forma con gobierno a actua rond di e asunto di minister Marisol Lopez Tromp, ta e ‘unico forma constitucional cu por logra cu no ta tranca gobernacion’ Asina prome minister Evelyn Wever Croes a contesta un ciudadano riba Facebook den fin di siman. Interesante ta cu e informacion tabata mas amplio mes, cu a duna na medionan di comunicacion mes. Di tur forma, informacion ta informacion y esaki a keda presenta pues riba e plataforma di red social Facebook. Continuacion di e contesta riba e tema tabata cu ‘ Ademas, e gabinete a opta pa kita cartera di minister Marisol Lopez Tromp ‘pasobra a presenta un situacion cu ta tranca gobernacion y nos mester a busca un salida asap di e problema aki, en espera cu Parlamento tuma un decision’. Esaki ta un contesta mas amplio cu e version cu e mandatario a duna publicamente diabierna. 

SALIDA TEMPORAL

Segun Wever-Croes, a busca un salida temporal cu ta tene cuenta cu interes di tur, cu Marisol Lopez-Tromp ta keda minister ‘tijdelijk zonder portefeuille’ cu un ‘specifieke taak’, mientras nos ta duna Parlamento espacio pa cana e procedura. Segun Wever, esaki ta e unico forma constitucional cu por logra cu no ta tranca gobernacion.

ASUNTO INTERNO

A haci tur esaki segun Wever, specialmente mirando cu esaki ta un asunto interno di un partido den cual ambos parti no por a demostra cu por pone interes personal un banda y interes general prome, pa cual ami mester a tuma e decision. “Y pa garantisa cu tur investigacion ta continua sin ningun clase di resistencia, e cartera ta bin resorta bou di mi Ministerio, y mi ta garantisa cu lo tin investigacion profundo, tambe investigacion nobo den casonan cu pa un of otro motibo no por a cuminsa den ultimo temponan” e mandatario a sigui bisa. 

COVID A BIN PA PURIFICA

“ Ami ta convensi cu Covid a bin pa purifica hopi cos. Cosnan cu hopi tempo tabata scondi, ta sali na cla awor” Wever a sigui bisa riba e pagina di e ciudadano. “ Lamentablemente e ta un asunto interno cu nos a pidi pa nan atende internamente, y nan no a logra. 

MINISTER LOPEZ A DEMONSTRA DEDICACION

E prome mandatario a bisa di ta lamenta tur esaki masha hopi mes, pa di prome pasobra segun Wever Croes, Minister Marisol Lopez Tromp a demostra den e lunanan cu e ta Minister dedicacion y pasion pa su trabou. “ Pero e problema aki ta uno constitucional, cu nos no conose minister independiente. E no ta existi. Si POR no ta sostene un minister mas, constitucionalmente bo no por hasi mucho” Wever a sigui bisa.