HAVA: Accion di docternan di cas pa dialuna ta posponi

ORANJESTAD – E medidanan di docternan di cas (accion di dialuna mainta) ta keda posponi por lo pronto. Asina un comunicado di e asosacion di docternan di cas (HAVA) a bisa diadomingo anochi. Segun HAVA, despues di a reuni cu AZV diadomingo mainta, HAVA a dicidi di pospone nan medidanan por lo pronto. “Nos ta hanja cu tin oido y posibilidad pa sigui delibera den e proximo dianan pa asina nos ta por spera cu nos lo yega na un acuerdo pronto” HAVA a bisa. Esaki ta nifica cu dokternan di cas lo ta habri e siman ki normalmente. 

“Nos kier aclarea cu nos meta no ta pa perhudica nos patientnan. E ta pa sigura cu integridad di nos cuido medico keda garantisa” e comunicado a sigui bisa. “ Pa sigura nos patientnan cu bo dokter di cas por sigui brindabo e servicio cu nan ta custumbra nos di HAVA. Cu e medidanan aplica nos practicanan lo encontra problemanan financiero severo cu consequencianan grandi pa e continuidad di cuido” e comunicado ta bisa. Mes momento nan ta bisa tambe cu un comunicado di prensa cu AZV a publica awenochi cu dokternan di cas ta sigui cu nan medidanan no ta correcto.