MUSICA y SMAC a haya otro awe riba Calypso y Roadmarch 2015

ORANJESTAD – MUSICA lo carga e conocemento cu nan tin pa por organisa conhuntamente cu SMAC den un comision, e Calypso y Roadmarch. E intendimento entre nan ta hopi cla riba con ta organisa esaki y con e tin cu cana. “Mi ta contento cu e la bay relativamente facil, cu a yega na e acuerdo aki” minister di Cultura Otmar Oduber a bisa despues di e reunion awe merdia na su despacho. Cu esaki tambe e Diferencianan cu tabatin entre SMAC, Musica y Gruponan Uni a keda elimina. E reunion di awe merdia a trece tur clarificacion cu tabatin segun minister di Cultura Otmar Oduber. “Awor tur hende por djis prepara nan mes pa un tremendo temporada di carnaval” e mandatario a bisa. E ta mustra cu e entusiasmo tey. “Tur hende ta 100% para tras di e organisacion di SMAC.

Tabata ayera despues cu e mandatario di cultura a yama partidonan hunto pa un reunion urgente, cu a bin sali na cla cu fundacion SMAC, Musica y Gruponan Uni mester a haya otro riba e aspecto di organisacion di Calypso y Roadmarch contest pa awe merdia 12'or. Esaki ta e punto riba cual partidonan a reuni casi 3 ora ayera cu minister di Cultura Otmar Oduber. E problema no tabata ken ta organisa e evento, sino con esaki ta sosode. Segun e mandatario, tabatin diferencia di opinion, cu mester wordo aclarea internamente. Mientra cu e mandatario a sigura cu e reunion a caba den bon ambiente, e no tabata un reunion facil. Y esei tambe a pone cu e reunion a dura asina largo. Contrario na pensamentonan anterior, ningun momento e aspecto di placa tabata un punto den e reunion, segun e mandatario su declaracion na prensa despues di e reunion di awe merdia.

E mandatario a confirma cu tabatin varios asunto cu a wordo discuti y aclarea tambe, y e unico asunto cu ta keda pendiente pa resolve, ta e aspecto di Calypso y Roadmarch. E mandatario a mustra tambe cu pa loke ta su intervencion, esaki lo continua tanten cu ta necesario. “Si esey ta nifica cu mi tin cu yama un of mas reunion, mi lo hacie. Mi ta keda esun responsabel pa e aspecto di cultura” Oduber a sigura NoticiaCla.com awe merdia. E mandatario a mustra cu Enbes di laga e baca hoga, e ta dicidi di drenta den e pos y saca e baca, prome cu esaki mester hoga. Como tal e la opta pa yama e reunion di ayera merdia, y pone partidonan hunto pa kita tur diferencia cu por tin.