Marisol Lopez Tromp: Mi no ta wak motibo valido pa retira

ORANJESTAD – Marisol Lopez Tromp no tin pensa di retira como minister. Esaki e mandatario a bisa un biaha mas diasabra atardi despues di un reunion cu un comision ‘intermediador’. E comision a keda institui un dia prome, despues cu a surgi un impasse den gabinete Wever Croes. Esaki pasobra un of dos minister di e gabinete a participa di no kier sigui reuni tanten cu Lopez Tromp forma parti di e gabinete. Mientras cu e Lopez Tromp no a bisa esaki directamente, a compronde di dje, cu e proposicion pa e keda cu un tipo di cartera ‘revisa’, e lo no acepta. Y tampoco retira, pasobra manera e mes ta bisa, Parlamento ta e caminda pa haci esey. 

RETIRO

Mescos cu tabata e caso algun luna pasa ora cu ya e partido POR a purba retira Lopez Tromp, awor tambe e no ta compronde e motibonan cu ta usa pa e retira como minister. Awe tambe el a ripiti cu ‘algun di e puntonan no ta puntonan nobo’, mientras cu tin puntonan ‘nobo’ cu a bin acerca. Lopez Tromp ta referi na un carta tambe di Andin Bikker, lider interino di e partido cu ta bisa cu awor ‘definitivamente partido (POR) ta retira su sosten na minister Lopez Tromp. 

CARTERA

E mandatario a referi tambe na e carta di premier Wever Croes riba e hecho cu ta kita su carteranan actual di Infrastructura y Medio Ambiente y ta lague encarga cu algo di recurso humano, y e proceso di ‘fast track’, pero cu segun e mandatario, no por wordo haci sin cu bo tin e cartera di infrastructura. E ta confirma tambe cu a puntre si e ta dispuesto pa retira como minister, pero basa riba e puntonan cu ta menciona pa cual e lo mester retira, y e hecho cu e no a haya chens di ‘defende’ su mes, e no ta mira pakico e tin cu retira. “Aparentemente tami lo ta causa un instabilidad na e pais, aparentemente tami ta e persona cu den un crisis ta trece problema” Lopez Tromp a sigui bisa.  “Si acaso ta un retiro ta desea, e caminda corecto segun ley, ta via Parlamento di Aruba” Lopez a sigui bisa. 

BIAHE

E mandatario riba un pregunta di e portal aki, a admiti cu e ta biaha diadomingo pa exterior pa hiba su yiu bay studia, y e no a wordo pidi pa e keda pa regla e asunto aki. “Mi ta bay hiba mi yiu”, el a contesta e portal aki tambe despues, indicando cu e no tin pensa di keda y warda eventualmente Parlamento yama un reunion. E ta haya si cu si tin un reunion asina unda cu posiblemente por entrega un mocion di desconfiansa, e mester tey pa por defende su curpa. 

KICO AWOR

E comision cu a reuni cu ne awe diasabra, awor mester traha un ‘raport’ di e loke a sosode den e  reunion y presenta esaki na gobierno. Ta keda e ora na gobierno pa tuma e siguiente paso. For di loke e ta mustra, ta cu e intencion di e partido POR pa ‘termina’ e asunto aki e fin di siman aki mes, lo no tuma lugar mas, a lo menos cu Parlamento yama un reunion den e proximo oranan y trata e asunto prome cu Lopez Tromp biaha. Mientrastanto, pa ley, Lopez Tromp ta keda minister y pa su persona, e ta keda cu su carteranan. 

REACCION DI GOBIERNO

Te cu diasabra atardi tempran, gobierno no a informa nada mas riba e caso, aunke ta spera un tipo di reaccion un ora pa otro, pa wak con ta pensa di sigui. Sea ta warda Lopez Tromp bolbe di exterior, y ta sigui atende trabou sin su persona, of ta dicidi cu den e proximo ratonan, un decision cay, cu mester resolve e asunto aki, den sentido cu tur partido por biba cu ne.