AZV: Pone ultimatum ta comosifuera HAVA no tin salud di pashent na pecho

ORANJESTAD – “AZV ta lamenta e reaccion di HAVA”, asina vocero di e seguro general Solange Tchong a bisa noticiacla.com diabierna, reaccionando riba e ultimatum cu e asosacion di docternan di cas (HAVA) a duna AZV. Segun HAVA, a duna AZV te dialuna pa reacciona, sino ta cera oficinanan di docter di cas. 

LOMBA CONTRA MURAYA

”Como AZV nos ta para lomba contra muraya unda cu un instruccion pisa di corta cu 5 miyon florin pa luna a wordo imponi”. Segun Tchong, pa Aruba haya e finanzas di Hulanda, AZV mester cumpli como un di e organisacion cu a wordo poni bou presion y pa corta gasto. 

HOPI DIFICIL

“Den nos bista AZV a bisa Gobierno di Hulanda y Aruba cu esaki ta hopi dificil y eigenlijk inhusto net den un crisis/pandemia mundial” Tchong a sigui bisa. “ Pero ta cumpli cu e instruccion y no ta solamente HAVA ta wordo afecta sino henter Aruba”. A pidi tur dunado di cuido pa ta solidario y entrega parti di nan entrada/salario mirando cu no tin entradanan (AZV premie y BAZV) dentrando Fondo di AZV. “AZV ta di opinion cu poniendo un ultimatum asina aki ta como sifuera cu no tin e salud di pashent na pecho. Sin embargo, AZV lo busca dialogo cu HAVA paso mas cu claro no kier e situacion escala” Tchong a finalisa bisando. Mes momento a bisa cu nan lo busca contacto cu HAVA mas pronto cu ta posibel, aunke no a duna fecha.