Bosman:” Mi mester duna Aruba espacio pa drecha su situacion financiero”

ORANJESTAD – “Mi ta contento cu e pasonan cu a wordo tuma pa drecha e situacion financiero di Aruba”. Prome comentario di un di e parlamentarionan hulandes mas critico di gobierno di Aruba, Andre Bosman awe merdia. E parlamentario a mengua su palabranan durante su bishita actual na Aruba, unda cu e ta  forma parti di e delegacion hulandes cu a bin pa e reunionnan parlamentario di 4 paisnan di Reino Hulandes. Apenas un dia na Aruba, ya caba e ta sinti cu tin un cambio. Como tal e parlamentario hulandes Andre Bosman di VVD a confirma na NoticiaCla.com cu e cooperacion entre parlamentarionan di Reino ta agradabel.

“Mi ta anticipa e siman aki cu bon animo! ”. Esaki no kier men cu Bosman ta menos critico riba Aruba. “Ainda mi ta hopi critico” e la sigura. “Solamente cu mi ta haya cu mester duna espacio unda cu mehoracion ta tumando lugar. Mi no ta sigui zeur eyriba” Bosman a sigui bisa. Aruba mes a tuma e pasonan y pa e motibo ey, Bosman ta hala atras un rato pa e cambionan di berdad tuma lugar. “Nan tin cu hacie si” Bosman a bisa. “Como Hulanda bo no mester sigui zeur cada bes”.

Loke cu ta haci e parlamentario hulandes contento, ta cu un instancia independiente ta tene su mes ocupa cu e presupuesto di pais Aruba. Segun e parlamentario, un presupuesto mester tin bon cifra, por balansa y real y di mas aña. Riba e pregunta cu si e tin confiansa den e gobierno aki e tabata hopi corto “Sigur”.

E la splica cu e critica cu e tabatin di Aruba, ta riba e presupuesto di Aruba cu cada bes tabata un problema. “Mi tabata bisa constantemente cu boso ta gasta mas cu boso ta haya na entrada. Bo por wel di bisa cu boso tin un balance budget act, pero ainda tin mas placa ta sali cu ta drenta. Asina un balance budget act no ta resolve nada. E buraco ta grandi caba. “E inseguridad ta grandi, y esey tabata mi frustracion. Y mi a bisa cu awor si cos mester drecha. Tur instancia financiero tabata precupa. Y tur esaki ta bay a costo di e ciudadanonan di e isla. Gobernantenan tin cu haci e trabou. Pero si nan no hacie, mi ta bay cuminsa pusha pa e sosode. Y tur esaki ta bay a costo di e pagado di belasting di Hulandesnan”.

Algun rato despues di e entrevista, e grupo di 7, miembronan di fundacion CAN y otronan, a aserca e parlamentario hulandes pa entregue un manifiesto, y tambe dirigi algun palabra na su persona. E dos personanan cu a hiba palabra tabata e politico y ex hotelero Jan de Ruijter y Michael Williams. Ambos a splica e situacion actual segun nan interpretacion y a pidi e parlamentario pa intermediacion. "Bo tin e chens di distancia bo mes di tur esaki. Tanten bo no haci tal, bo ta keda co-culpabel" Williams a bisa. De Ruijter a repasa su trayectoria di keho contra e mandatario Otmar Oduber y tambe a pidi intervencion di Bosman pa cu e causa di dje. Bosman na su turno a gradici e manifestantenan y a priminti cu e lo a hiba e mensahe entre otro pa minister Ivo Opstelten. "Mi ta aprecia e carta bon documenta, y ta admira cu boso tin e derecho di por protesta" Bosman a bisa entre otro.