Barco crucero Freewinds a yuda combati COVID-19 na Aruba

ORANJESTAD- Personal di e barco crucero Freewinds a yega combati COVID-19 na Aruba. Asina nan ta raporta via un comunicado. Nan ta recorda cu mescos cu otro parti di mundo ora cu e pandemico di Covid-19 a plama mundialmente na maart, residentenan di Aruba a wordo obliga pa aplica e regla di  “Shelter in Place” na cas, scolnan a sera, mayoria di comercio no a wordo permiti pa habri y turismo a para completamente ora nos fronteranan a sera.

Pa e motibo aki Freewinds a traha hunto cu Departamento di Brandweer en coordinación cu  e Comision di Crisis di Aruba y DVG den e lucha contra Covid-19 cu e meta pa yuda e isla y e economía bek riba su pia.

A cuminsa desinfecta na comienzo di april usando e producto D7. E Ministerio di Boluntario di Freewinds hunto cu e Departamento di Brandweer di Aruba a sera cabes pa desinfecta mas cu 120 localidad, cubriendo 1.1 miyon pia cuadra di espacio rond di Aruba, den e lucha pa Covid-19 no plama riba nos isla. E localidadnan a inclui scolnan, misanan,centro di bario, wardanan di polis, facilidadnan di nos fundacionan, oficinanan di gobierno y mas.

Hunto cu e servicio di desinfecta, e Ministerio di Boluntario di Freewinds a distribui mas di 90.000 buki di “Stay Well” riba nos isla. E bukinan aki ta duna información educacional apropia den un formato hopi fácil pa lesa y cu hopi portret con pa mantene bo mes saludabel, con pa desinfecta bo cas of bo oficina y kiko pa hasi ora abo of un miembro di bo famia bira malo.

Port Captain di Freewinds, Sr. Ken Weber, a bisa, “ Freewinds  a forma parti di e comunidad Arubano pa mas di 30 aña. Nos Tabatin e hermentnan necesario pa yuda den e lucha den forma di e bukinan di  “Stay Well” y e producto D7. Di ningun manera nos lo a para na banda y spera cu cos lo mehora. Nos a dicidi di tempran pa envolvi nos mes. E cooperacion entre e Ministerio di Turismo, Salud Publico y Deporte, Departamento di Bombero y DVG tawata excelente. Maske nos ta manteniendo nos distancia, nos ta hunto den esaki.”

Mientras e fecha di reapertura di nos scolnan tawata asercando e Departamento di Enseñansa a bira otro parti di e equipo coordinando e proceso di desinfecta e scolnan. Banda di esaki e bukinan di “Stay Well” y e videonan a wordo obsekia pa educa e studiantenan.

Despues di a desinfecta Commandeur Pieter Boer School y obsequiando e scol un cantidad di buki di “Stay Well” E cabesante, Sra. Ustelle Cornet a bisa:” Esaki ta hopi bon informacion pa tin. Nos lo por duna e información correcto na nos alumnonan usando e bukinan aki. Nos por usa e videonan pa un di nos prome lesnan. Hopi danki pa loke boso ta hasi. Dios bendishona boso.” Awo cu nos fronteranan a habri y hende ta yega di otro paisnan, ta inevitabel cu casonan di Covid-19 lo subi. Pesey ta asina importante pa e protocolnan  wordo sigui pa proteha abo personalmente  y tambe otronan pa asina mantene e cantidad di casonan na un minimo.