Kapel di Alto Vista atrobe tabata blanco di vandalismo

ALTO VISTA – Diabierna mainta un biaha mas Kapel di Alto Vista a lanta tur vandalisa, cu pintura di graffiti cu mensahenan no apropia. Mensahenan di graffiti tabata inclui entre otro e number 666 (conoci como e number di diabel), e asina yama ‘hakenkruis, of swastika (simbolo di guera  tempo di Adolf Hitler), te na un mensahe como desprecio di Jesus. No ta prome biaha cu e kapel ta bira victima di vandalismo. Mirando cu fuera di ta un sitio religioso popular bishita pa nos localnan mes, e ta un atraccion turistico. Esaki ta pone cu e ta un blanco ‘facil’, cu ta haya atencion liher. Ya mainta, tabata haci tramite manera cu e portal aki a compronde, pa kita e graffiti y drecha loke mester wordo drecha ‘atrobe’, pa lague den un estado ‘normal’ bek. No ta conoci ken a haci esaki ni sin tin pista di ken lo por a haci esaki.