Elmar ta desmenti envolvimento di coriente interno di un bar na San Nicolas

ORANJESTAD – E compania di utilidad Elmar ta desmenti envolvimento di su trahado den trabou interno di un bar na San Nicolas. Esaki relaciona cu e situacion cu a surgi diaranson anochi unda cu dos persona a perde nan bida. Den un comunicado, Elmar ta bisa di a tuma nota di declaracion di e propietario di Latin Passion encuanto presunto envolvimiento di un trahado di Elmar referente conexion di un generator na e establecimento aki. 

SPLICACION

Segun e comunicado di e compania di utilidad, conforme Elmar su aansluitingsvoorwaarden, Elmar su responsabilidad ta yega te na e meter di Elmar y N.V. Elmar no ta mishi den instalacion di coriente di e cliente. Como tal conexion di un generator na e instalacion electrico di e establecimento no ta un practica of servicio permitibel di N.V. Elmar su trahadonan. 

CASO INUSUAL

E caso aki ta uno inusual y no ta forma parti di ningun procedura of servicio tecnico cu ELMAR ta brinda. 

CARTA 

Dia 17 di juni Elmar a manda carta pa tur cliente pa atende cu cuentanan atrasa y a informa over areglo di pago. Na luna di juli Elmar a reanuda su operacion normal y como cu no a yega na un areglo a desconecta e servicio di coriente na e percela.

CONDOLENCIA

Elmar ta manda sincero condolencia na e famia di e fayecidonan y ta desea pronto recuperacion na e otro dos victimanan. E potret ta di archivo di Elmar y no ta representa e persona of personanan di Elmar posiblemente menciona den e relato aki.