Minister na HAVA: No perhudica comunidad net aworaki!

ORANJESTAD – “Nos ta compronde e reaccion y preocupacionan di Hava pero segun mi no ta na su lugar pa perhudica comunidad net na e momentonan aki y nan ta na e adres robez”. Esey tabata e prome reaccion di e minister di salud responsabel pa AZV, na e asociacion di docternan di cas HAVA. E ta referi na e ultimatum cu HAVA a pone pa AZV, cu ta vence otro siman sino docternan di cas ta cera porta pa pashent. 

BAY CERCA VNO Y NO AZV

Segun Oduber, HAVA ta na adres robez. “Nan mester ta serca VNO y no serca AZV” Oduber ta bisa. Segun e mandatario, tur hende incluyendo Hava mester ta solidario cu comunidad. “Tur hende mester a entrega y nan sa cu e decision tuma no ta un decision cu gobierno of AZV a tuma pa “bezuinig” sino ta Hulanda ta impone esaki riba nos tur” e mandatario ta sigui bisa. 

NO KIER ‘NINGUN TIPO DI BEZUINIGING’

E mandatario ta sigui bisa cu si ta pa gobierno, ta pa nos, no tin ningun tipo di bezuiniging den cuido medico net na e momentonan aki. “Nos no lo a desea di corta ni 1 florin awor aki! Nos a bisa Staatssecretaris Blokhuis na mas cu un ocasion cu ta totalmente contradictorio cu nan kier obliga nos bezuinig 5 miyon pa luna net den momentonan di mas dificil y den pleno covid” Oduber a bisa. “Tambe nos a puntra na varios ocasion con nan a yega na e suma di 5 miyon. Te dia di awe ni CAFT ni staatssecretaris Blokhuis por a substancia con nan a yega na e suma aki cual sigur ta lamentabel cu nos no a haya un splicacion ainda kiko a conduci pa tuma un decision asina drastico riba nos cuido medico den pleno crisis di e pandemia aki. E timing ta totalmente robez!” e mandatario ta sigui bisa.

AZV TA DISPUESTO

AZV ta mas cu dispuesto pa sinta cu Hava pa yena na un palabracion cu ta acceptabel pa Hava y soluciona e issue aki pa por percura cu tin continuidad den e promer liña di cuido segun e minister. E ta importante pa tin un solucion pa e preocupacionan di Hava y nos ta consiente di esaki. E situacion no ta uno saludabel cu patientnan ta wordo perhudica. “Nos ta lamenta e situacion cu Hulanda ta creando na Aruba pa nos cuido y pesey te awe nos no por compronde di unda Hulanda a yega na e decision pa instrui nos bai corta 5 miyon florin pa luna den cuido medico den pleno crisis di Covid, e ta lamentabel e actitud di Hulanda sabiendo e consequencianan pa continuidad di cuido” Oduber a finalisa bisando.