Docternan di cas cu ultimatum pa AZV sino ta cera porta

ORANJESTAD – HAVA (Huisartsen vereniging van Aruba), no por ta di acuerdo cu e medidanan manera cu nan ta wordo implementa (pa reduci gastonan di AZV) manera cu ta conoci, ‘paso esaki ta bai afecta e calidad di cuido drasticamente”. Y como tal HAVA a bin cu ultimatum pa AZV scucha nan, sino lo cera tur oficina di docter di cas entrante otro siman dialuna, 27 di juli 2020. Asina e asosacion ta bisa den un carta pa prensa diahuebs mainta. Mes momento nan ta bisa si cu ‘e dokternan di cas kier ta solidario den e situacion di crisis cu ta reina’. 

GASTONAN DI AZV

E asosacion ta recorda den nan comunicado cu manera ja ta conoci gobierno di Aruba a han?a orden di Hulanda pa baha e gastonan di AZV cu 5 miyon florin pa luna. E exigencia aki a bin apesar cu Aruba ta pasando den un situacion hopi difisil door di e crisis causa door di COVID-19. “ A pesar di varios intento door di HAVA y e stakeholders di otro sector di cuido pa sinta na mesa cu AZV y purba na yega na un manera responsabel di reduci gasto esaki no a logra. AZV a dicidi di djis corta entradanan di oficinanan di dokter di cas di tal forma cu no por cubri tur gastonan di operacion y personal mas” HAVA ta sigui bisa. “Ademas AZV, sin anuncio oficial, unilateralmente a dicidi di implementa su medidanan cu ‘terugwerkende kracht’ cuminsando desde januari 2020. Esaki apesar cu den luna di januari, februari y maart no tawata tin un situashon di crisis y tampoco tabata existi e demanda for di Hulanda pa e reducion di gasto di 5 miyon pa luna”.

SOLIDARIO PERO.. 

E dokternan di cas ta bisa cu nan kier ta solidario den e situacion di crisis cu ta reina “pero nos no por ta deacuerdo cu e medidanan manera cu nan ta wordo implementa paso esaki ta bai afecta e calidad di cuido drasticamente”. Y nan ta sigui splica pakico. 

PAKIKO CONTRA

Segun HAVA, manera menciona dokternan di cas tin gastonan mensual halto. E medidanan tuma door di AZV ta causa un deficit grandi den entrada di e practica di e dokternan di cas. Esaki ta hasi cu e compania di dokternan di cas no tin of no ta resta suficiente fondo pa por cumpli cu tur e gastonan di oficina of cu salario di e empleadonan. Si no por cumpli cu e gastonan di oficina of no por paga e assistentnan dokternan di cas no por garantisa e cuido mas na nan pashentnan. HAVA ta di opinion cu cuido primario, awo mas cu nunca, ta un di e sectornan esencial cu aworaki mester juist extra fondonan pa por sigui brinda e cuido necesario den tempo di crisis.

ALTERNATIVA

Tambe nan ta menciona cu HAVA y otro dunadornan di cuido a presenta AZV cu alternativanan pa jega na e exigencianan cu Hulanda a pidi pero lamentabelmente AZV no a duna oido na esaki.

CONSEQUENCIA DI E MEDIDAN DI AZV

HAVA ta lamenta cu door di e medidanan nan no ta wak otro solucion cu tuma accion contra di AZV. Esaki ta nifica cu si AZV no reacciona positivamente riba peticion di HAVA, dialuna 27 di juli tur oficina di dokter di cas lo ta cera pa publico. Pa casonan di emergencia por acudi na huisartsenpost (HAP) of spoedeisende hulp (SEH) na hospital. Orario di HAP ta di 9or di mainta pa 1or di merdia y di 6or di atardi pa 10or di anochi. Pa casonan di emergencia pariba di brug por acudi na oficina di drs M.Wever. HAVA ta spera cu no mester yega na escalacion y cu pronto cada praktijk por sigi traha cu su team completo na servicio di tur patient. Nos kier ta sincero cu nos no kier perjudica salud di nos patientnan pero pa manda un sen?al cla cu nos sistema di cuido mester atencion urgentemente.

KEN TA HAVA

Tur e dokternan di cas na Aruba ta wordo representa door di HAVA. Actualmente tin 48 dokter di cas na Aruba Con oficina di dokter di cas ta traha? E oficina di dokter di cas ta un compania chiquito riba su mes. E dokter di cas mester cumpli cu varios requisito manera ta wordo stipula den lei cu ta valido pa tur compania. Esaki kiermen cu e practica di dokter di cas ta paga huur of hypotheek di nan oficina, tambe ta paga coriente, awa, telefoon, diferente seguronan, SVB, KVK, pensioen, belasting, abogado, accountant, gastonan pa limpiesa, tur material medico cual ta wordo usa den e oficina, muebles, salario di e dokter y e assistentnan. Tur esaki mester wordo paga for di e suma mensual cu e dokter di cas ta ricibi di AZV.