Lampe: A logra cambia directiva di SMOA e siman aki

ORANJESTAD – SMOA/SVOA a cambia di directiva diaranson ultimo. Asina minister di enseñansa Rudy Lampe a anuncia diahuebs mainta durante un conferencia di prensa. Esaki kier men cu e actual directiva, cu excepcion di Brechtje Huiskes, ta retira mesora, incluyendo sr Robert Croes II. Huiskes, riba peticion di gobierno, lo keda den e directiva, te cu 1 di September 2020, pa asina haci un traspaso ordena. Miembronan nobo di e directiva cu ta bin acerca, ta Reverendo Juancho Pilongo y Ernesto Rozenstand. Obispado y OCCA tin cu apunta nan representante awor den e directiva manera cu e statuto ta prescribe. A gradici sr Robert Croes II pa su trabou y dedicacion di e ultimo 3 añanan, y tambe a gradici sra Huiskes pa a ofrece pa e sigui.

E CASO SUMARIO

Mes momento minister Lampe a confirma cu debi na e acuerdo cu a keda logra diaranson, a dicidi cu ta retira e caso sumario cu SMOA/SVOA lo a entama contra gobierno pasobra a para e subsidio. Esey ta nifica cu no tin caso mas. Gobierno mes momento tambe a confirma cu lo sigui cu e subsidio manera cu ta custumber. Y tambe a confirma cu e decision di laga Stichting Katholiek Onderwijs Aruba (SKOA) tuma e maneho over pa 2 luna entrante 1 di augustus 2020, ta cancela tambe ya cu SMOA/SVOA mes ta bay keda encarga cu e maneho di e scol. 

PAKICO NO ROBERT CROES

Riba pregunta di e portal aki, minister Lampe a bisa ta riba peticion di sr Robert Croes II mes, a dicidi pa hala atras y laga sra Huiskes keda temporalmente y no Croes. Croes berdad na comienso a bisa cu e ta dispuesto pa retira pero lo kier keda te 1 di September 2020. Pero segun Lampe, mirando tur e controversia (sin necesidad segun Lampe) cu tabatin rond di e nomber di sr Croes, Croes mes a dicidi di hala atras, contal cu tin garantia cu e cambio responsabel tuma lugar. 

OCCAE mandatario a bisa tambe cu pa loke ta e asosacion di mayornan di Colegio, OCCA, nan lo wordo acerca aworaki pa cu e cambio aki, unda cu nan tambe por pone un miembro di nan asosacion den e directiva. Lampe a confirma tambe na e portal aki cu OCCA no tabata participe den e acuerdo cu a keda cera diaranson ultimo.