DVG ta sigura cu nunca Aruba a permiti gorgel test for di Hulanda

ORANJESTAD – For di fin di siman pasa, varios persona cu a yega Aruba for di Hulanda, a confronta ‘problema’ cu nan test di COVID-19, unda cu mientras cu nan a paga y haci test na Hulanda caba, ora cu nan a yega Aruba, a bolbe pone nan haci test. Diaranson anochi Sharline Koolman di DVG a splica cu enberdad no ta acepta e test cu e personanan aki a haci, esta e gorgel test, pasobra e no ta sigur, y no ta aproba tampoco pa e instancia di federal di salud Hulandes RIVM, sino solamente e nasopharyngal swab. 

NENGA TEST

Mientras cu Koolman ta sigura (riba pregunta di e portal aki) cu nunca no a permiti e testnan aki, e portal aki tin informacion cu e prome simanan, Aruba si a permiti entrada na e personanan aki, riba buelo di e.o. TUI y Corendon. Informacion cu e portal aki tin ta mustra cu ta siman pasa Aruba lo a compronde cu no ta permiti e testnan aki na Hulanda y a cuminsa prohibi nan. Pero Koolman a sigura diaranson anochi, cu esaki no ta e caso. 

CUA TEST SI Y CUA NO

Segun Koolman, e unico test cu ta permiti, ta e PCR test, cu ta un nasopharyngal swab. E ta un tipo di qtips largo cu ta pasa via buraco di nanishi y ta bay straight te na e garganta unda cu e virus ta acumula. Aki ta scrap parti di e loke tin riba e ‘muraya’ di e garganta pa haya ‘prueba’. Ta haci esaki dos biaha, esta for di cada buraco di nanishi pa tin un prueba completo. E test di gorgel, ta djis usa un likido special of awa cu salo,  unda cu e persona ta gorgel esaki den su boca y scupi esaki pafo den un potchi. E contenido ta loke ta manda despues pa test. Pero segun Koolman, por compronde cu e test aki no ta bay contene e virus. Pesey no ta haci esaki. Pero segun Koolman, na Hulanda varios caminda a opta pa esaki pasobra no ta tur caminda tin personal pa haci e otro tipo di test esta e nasopharyngal swab. 

KEHO

E keho cu tabatin ta cu hendenan cu a tuma e test di gorgel, a paga esaki caba, y despues na Aruba mester a bolbe paga. Varios di nan tabata studiante, cu comprendiblemente esaki a bira un gasto extra cu pa un studiante no ta dushi. Ora cu nan a bin Aruba y keda confronta cu esaki, a bin resulta cu e test aki tin su motibo pakico e no ta wordo aproba.