Edificio DIMAS/DAO bek den servicio pa publico atrobe

ORANJESTAD – For di dialuna, e edificio di DIMAS/DAO a habri bek pa publico y cuminsa brinda servicio back na Paardenbaaistraat. Na e ocasion aki tawata presente tanto Minister di Labor Paul Croes como minister di Infrastructura y Integracion, Benny Sevinger cu a hiba un discurso na personal na ocasion di un aña nobo, y tambe a duna un splicacion extenso di kico tur a acontece durante e 13 simannan cu DIMAS/DAO su edificio tawata down pa sanacion. Personal di tanto DIMAS (como DAO) a haya tambe oportunidad pa haci pregunta na e mandatarionan (y of DOW y infrateam cu tambe tawata presente.) pero no tawata tin ningun pregunta.

E reunion a bai den un esfera positivo y importante ta pa subraya cu den e 3 pa 6 lunanan cu ta sigui lo sigui vigila e edificio di serca y evalua si e pasonan y tur medidanan tuma tawata suficiente (of si ainda mester tuma otro of mas medida.) Staf y personal di DIMAS ta sumamente contento di por ta ubica back na su edificio den un ambiente di trabou cu ta y sigur y sano tanto pa personal como nos clientenan. DIMAS ta recorda su clientenan cu desde 5 di januari 2015 DIMAS a reanuda tur su servicionan desde su oficina na Paardenbaaistraat y pues no lo ta operando mas for di e localidad temporal di Enseñansa pa Empleo, Departamento di Enseñansa y DIA.