Encuesta: Mayoria kier Rijkswet pa Aruba pero no aumenta edad di pensioen

ORANJESTAD – Mayoria di siguidornan di e portal noticiacla.com ta aproba pa Aruba haya rijkswet, tanto pa supervision financiero como pa e entidad nobo CHE. Por lo menos segun un encuesta cu e portal aki a conduci durante un fin di siman. Interesante ta cu mientras cu gran mayoria di esnan encuesta (68%) ta ok cu un rijkswet, e mayoria di esnan encuesta no kier dolarisacion (62.24%) ni tampoco aumento di edad di pensioen (55.25%). Tambe interesante ta e hecho cu si tin e opcion solamente di firma si of no cu Hulanda, mayoria (56.14%) ta bisa pa firma. Y si mester dicidi via un referendum kico Aruba tin cu haci, tambe e mayoria a dicidi positivo (63.14%). E prome grafico ta mustra ensan cu a bisa si of no.  

RIJKSWET PA SUPERVISION FINANCIERO

Riba e pregunta cu si bo ta bay di acuerdo pa Aruba haya mas supervision bou di un Rijkswet, y a cambio Aruba a haya un oferta di Hulanda pa fiansa contra interes abou, mayoria (68%) tabata di acuerdo. Pero, di e mayoria, e grupo cu mas a vota pro, ta di edad hoben entre 18-24 y 35-44 (77%). E grupo cu menos a vota pro pa e Rijkswet, tabata di edad 65 y mas halto (50%). E grafico ta mustra e grupo cu a vota PRO. 

ENTIDAD 

Pa loke ta introduccion di un entidad independiente (Caribisch Hervormings Entiteit) CHE, cu Aruba tin cu acepta pa medio di un Rijkswet, tambe mayoria (55.44%) a bay di acuerdo. Esaki aunke segun politiconan local, e ta indica cu e binimento di e entidad, tanto gobierno como parlamento por eventualmente perde control. Esaki no a stroba esnan cu a participa, di vota pro. Pero aki atrobe, e grupo di edad 65 y mas halto, tabata esun cu menos a vota pro (37%) mientras cu e grupo cu mas hopi a vota pro, tabata di edad 35-44 (68%). E grafico ta mustra e grupo cu a vota PRO. 

HISA EDAD DI PENSIOEN

Un di e puntonan den e pakete di Hulanda pa Aruba ta, cu mester aumenta edad di pensioen. Mas specifico, cu mester hisa edad di pensioen na 66 aña na 2023 y na 67 aña entrante 2025. Y e pregunta tabata si e participante di e encuesta tabata di acuerdo cu esaki. Aki si, e mayoria (55.25%) tabata contra pa aumenta edad di pensioen manera cu Hulanda a propone. Interesante pa sa tambe, ta cu e grupo di mas hoben esta 18-24 ta esun cu tabata pro (77%), mientras cu tur otro edad a vota 52% of menos pro. E grupo di edad cu menos a vota pro pa aumento di edad di pensioen, ta di 55-64 aña cu ta 35%. Ta sigui e grupo di 65 aña y mas halto cu a vota solamente 38% pro aumento, cu ta nifica cu nan a vota 62% no.  E grafico ta mustra e grupo cu a vota PRO. 

DOLARISACION DI ARUBA 

E pregunta cu si mester dolarisa Aruba (Hulanda a sugeri pa un investigacion riba e impacto y introduccion di esaki), tambe a conta cu resistencia. Aki 62.24% di esnan encuesta, a bisa cu nan no ta pro pa dolarisa Aruba. Interesante ta cu aki atrobe, e grupo di hoben (18-24) a vota 62% pro dolarisacion pa Aruba. E grupo di mas edad (65 plus) a vota apenas 23% pro dolarisacion. E otro edadnan nan porcentahe di aprobacion tabata den 40%. Pues 60% tabata contra, cu ta cuadra cu e resultado completo esta cu 62.24% a vota contra. E grafico ta mustra e grupo cu a vota PRO. 

CUMPRA ACCION DEN COMPANIANAN ESTATAL DI GOBIERNO

Loke tabata interesante ta cu na e pregunta basa riba un otro condicion cu Hulanda ta pone na e fiansa y e ayudo di desaroyo. Esta cu ta e entidad CHE por cumpra accion den companianan estatal di gobierno, mirando cu Hulanda ta di opinion cu gobierno di Aruba no necesariamente mester ta doño di e companianan aki. Aki mayoria (50.59%) a bisa cu nan no tin problema cu esey. E grupo mas grandi cu ta pro e idea di laga e entidad cumpra shares ta esun di 35-44 aña (63%), mientras cu esun di edad mas grandi (65 plus) a vota apenas 35% pro e idea. E grafico ta mustra e grupo cu a vota PRO. 

TENE REFERENDUM

Y un forma pa midi e opinion di un comunidad, ta a base di un referendum. A puntra si esaki ta un forma cu lo por/mester midi e opinion. Aki gran mayoria (63.4%) a bisa cu nan kier pa esaki sosode pa medio di un referendum. Pero aki atrobe, e grupo di hoben (tanto 18-24 y 25-34 aña) a vota mas hopi (77%), mientras cu e grupo di edad mas grandi, (65 plus) a vota apenas 56% pro. E grafico ta mustra e grupo cu a vota PRO. 

DJIS FIRMA

Y finalmente, a plantea e pregunta, cu si gobierno di Aruba haya e opcion pa djis firma of no, pa acepta e dos leynan di Reino (Rijkswet), mayoria atrobe (56.14%) a bisa cu nan no tin problema pa esey. Aki e grupo mas grandi cu a vota pro (66%), tabata di e edad 35-44 aña. E grupo menos entusiasma pa firma, tabata di edad 65 plus, cu ta 38%. E grafico ta mustra e grupo cu a vota PRO, CONTRA y INDIFERENTE

DATOS

E data a keda colecta entre diabierna y dialuna, y no ta pretende di ta un encuesta representativo di Aruba completo, sino entre e usuarionan di Noticiacla.com. E tabata un encuesta completamente anonimo, cu participacion di 777 persona.