Awor cu helicopter a zink, investigacion ta bira mas dificil

ORANJESTAD – E hecho cu e helicopter di marina Real a zink dialuna atardi, ta haci e investigacion di e accidente mas dificil. Asina defensa Hulandes ta raporta. Despues cu e helicopter a crash, 4 boei tabata wanta e helicopter 'riba superficie di laman'. Pero ya pa dialuna atardi, 2 di e boeinan a rementa, causando cu e 2 otro restante boeinan no por a wanta e helicopter mas. Tabata diadomingo atardi cu e helicopter despues di un patruya di costa di Aruba, a crash 12.5 kilometer di nos isla, lagando dos military Hulandes morto. A haci tur posibel pa scapa e helicopter, pero esey  a bira dificil debi na e biento fuerte y laman bruto. Tabata importante pa tin e helicopter pa e investigacion. Segun e hefe di operacion Boudewijn Boots, si e helicopter zink, lo mester considera esaki como perdi. Esaki pasobra e laman ta 2 pa 3 kilometer hundo.