Atrobe parlamentario independiente na Corsou Calmes a cancela conferencia

WILLEMSTAD – Pa di dos biaha parlamentario independiente na Corsou Rennox Calmes a cancela su conferencia di prensa pa presenta su punto di bista. Calmes ta e parlamentario cu den fin di siman a kibra cu su partido PIN pa motibonan cu ainda no ta complete cla. E la keda di informa riba esaki durante un conferencia di prensa dialuna atardi, y despues a bisa cu esaki lo bira diamars mainta. Pero mainta tempran awe, el a dicidi di cancela esaki, citando ‘ algun suceso tumando lugar y pa e motibo aki mi ta pospone e reuda di prensa di awe mainta’. Comentarionan riba red social no ta mucho positivo riba e actuacion di Calmes, y a cuminsa te hasta tilde di flip flop. 

SITUACION POLITICO

E situacion politico na Corsou for di fin di siman ta complica. Esaki pasobra cu e retiro di Calmes for di PIN, e partido ta keda sin asiento pa cual su lider mester retira como minister, y falta un parlamentario di cual su credencialnan ta acepta, pa huramenta ainda. Gabinete Rhugenaath awor pues tin apenas 10 asiento vs 10 di oposicion. Cu retiro di PIN, e gobierno a baha di 12 asiento pa 10, pasobra falta Marylin Alcalá Wallé cu no a huramenta ainda. Si e huramenta sin problema, gobierno ta bay bek na 11 asiento y asina tin un mayoria minimo, pero por lo menos gobierno no a cay. Si Alcalá no bolbe pa PAR, pero tambe dicidi di bira independiente, e ora si cos ta cambia pa gobierno. E portal aki a compronde cu pa diahuebs awor, mester bin claridad riba e situacion di Alcalá. Mientrastanto, situacion di gobierno ta keda tenso.