Interpretacion Statuut trata den reunion tripartit parlamentario

ORANJESTAD – Interpretacion di statuut a haya hopi atencion den reunion tripartit, segun presidente di parlamento di Aruba Marisol Lopez Tromp a bisa NoticiaCla.com na final di e reunionnan di awe. Papia habri y cu respet cu otro riba diferente topico cu pa basta aña ta riba agenda, tabata e liña principal cu a discuti ariba, entre Aruba, Corsou y St Maarten. No a concretisa riba e puntonan pero si a duna nan tur atencion. A prepara e reunionnan di e siman tambe y a bay den profundidad riba varios topico mes momento. Y finalmente a programa futuro reunionnan tripartit, ya cu ta mira necesidad pa esaki bin bek manera antes.

Ora cu papia riba topiconan cu ta riba e ‘agenda eterno’ sin cu e por haya atencion, ta entre otro geschillenregeling. “Tur hende ta di acuerdo cu e tin cu bin, pero den e forma cu e mester bin, y cua instancia tin cu atende cu esaki, a discuti hopi” Lopez Tromp a bisa. E union den tres islanan Caribense a bin na ordo y a delinea con pa trata cierto topiconan hunto den futuro. Un discusion cu a bay den basta profundidad. Fuera di geschillenregeling, a trata tambe otro topiconan manera screening di kandidaat minister, reglamento di orden di gobernador.

E reunionnan a termina den careda di dialuna atardi y Lopez tabata contento cu e resultado. Un hecho cu a uni tur hende tabata e minuto di silencio pa ex politico Efrain de Kort cu a fayece recientemente. E hecho cu e tabatin un funcion den constelacion antiano, a pone cu tabata na su lugar segun e partido cu e la yuda funda, esta MEP, pa rindi tributo na dje, den forma di un minuto di silencio. E potretnan ta mustra momento cu e delegacionnan a bandona sala di parlamento, y ta prepara pa e resto di siman, ora cu e reunionnan interparlamentario di Reino mes cuminsa.