Defensa Hulandes: Coleganan di barco di guera a wak e helicopter cay nan dilanti

ORANJESTAD – E Helicopter di marina Real cu a cay diadomingo, ya tabata den bista di su base, esta e barco  Zr.Ms. Groningen, ora cu el a cay diadomingo merdia. Mesora nan a saca un boto pa asisti nan coleganan. Tur 4 cu tabata den e helicopter ta parti di e tripulante di e barco. Asina defensa Hulandes ta laga bisa awor den un raportahe. Dos militar a  fayece, ambos piloto, Christine Martens (33) y Erwin Warnies (34) tabata obviamente sinta dilanti den e cabina di e helicopter. E otro dosnan, un operador di sensor y un specialisa den rescate tabata patras. E ultimo dosnan a haya solamente herida leve. E hecho cu coleganan di esunan di e helicopter a mira tur cos sosode nan dilanti, tabatin un impacto hopi grandi riba nan. Mientras cu berdad e tabata un desgracia, e bon tabata cu nan mes mesora a saca un boto pa yuda, sin cu mester a warda riba un raportahe di ubicacion di localidad, cu a spaar hopi tempo. 

HELICOPTER A BOLTER

Ora cu e coleganan a yega na e helicopter, ya esaki a bolter cabez abou. E dos tripulantenan cu tabata patras, a logra saca nan mes, pero e dosnan den cabina, tabata pega ainda. A logra saca nan di nan stul, transporta nan rapidamente pa e barco y a purba reanima nan pero sin exito. Tanto e victimanan y esnan herida lo keda riba e barco, pero ta bolbe cas awor. Mientrastanto defensa ta purbando pa saca e helicopter for di awa, cu ta resultando mas dificil. Ta den deliberacion cu un compania priva pa saca esaki.  E helicopter ta drief ainda danki na e boeinan cu ta poni na esaki, como metodo di rescato. Asina cu e helicopter a mishi cu e awa, e boeinan a keda active automaticamente. Mester haci liher si pasobra cu e biento fuerte, y olanan halto, ta haci dificil pa yega na e sitio pa por haci e trabou. Ta haciendo tur lo posibel pa gara e helicopter prome cu esaki bay fondo. Y cu e fondo 2 pa 3 kilometer hunto, esaki ta bira mas dificil ainda.

CAHA PRETO

Cu e ayudo di e caha preto (a localisa esaki 5 km di e sitio), ta confia cu por sali for di e problema di sa kico a bay malo. Aunke cu e dos sobrevivientenan lo por duna un indicacion tambe.