Supuesto accidente cu helicopter di Defensa Hulandes cu varios morto

ORANJESTAD/WILLEMSTAD – Un accidente cu un helicopter di marina Real (Defensa Hulandes) entre Corsou y Aruba lo mester a laga un saldo di persona morto. Oficialmente Defensa Hulandes no a duna nada ainda, debi cu aparentemente lo mester informa tur famia di e victimanan. A compronde cu 5’or di dialuna marduga, 11’or di diadomingo anochi, ministerio di Defensa Hulandes na Hulanda lo tene un conferencia di prensa pa divulga mas informacion. Mas prome, tabatin informacion no confirma cu e helicopter lo a ‘ditch’ y cu 2 di e 4 personanan abordo (2 tripulante y dos pasahero) lo a accidenta di cual 2 lo a fayece. Awor ta resulta cu e candidad di morto por ta mas. Pero atrobe, ningun detayes tabata wordo duna. Tur intento di e portal aki, a haya un ‘no comentario’ como contesta. Na Corsou, a wak un otro helicopter di marina Real aterisa y busca personal. Na Aruba mes, tabatin un helicopter di marina real parti suid di Aruba diadomingo merdia, bisto di for di costa mes, bulando basta straño. Esaki tabata den careda di 1’or y mei di diadomingo merdia. E la bula hopi abou, haci bueltanan straño y disparce. No ta conoci si ta e mesun helicopter, tipo NH90, ta esun cu lo a accidenta. Potret cortesia di Dick Drayer.