Wever: Si tin fayo den control pa turista pa COVID-19 cu bin Aruba, mester cambia esaki

ORANJESTAD – Si tin fayo’ den control pa turista pa COVID-19 pa  Aruba, mester cambia esaki. Asina noticiacla.com a compronde di premier Evelyn Wever Croes. Den e ultimo dos dianan Aruba a registra no menos cu 5 caso positivo di COVID-19. Un di nan ta un residente cu a bin via Miami, y e otronan ta turista. Mientrastanto prome minister riba pregunta di e portal aki, a reacciona cu no ta descarta cu lo mester ahusta e sistema si algo a bay fout. Segun e mandatario, si e loke a pasa e siman aki cu un turista Mericano a logra ‘bypass’ e sistema di control pa COVID-19 y toch a logra drenta Aruba (infecta cu e virus), "esey ta un ‘glitch den nos sistema y nos tin cu atende cu ne". E mandatario ta referi na e casonan di diahuebs, unda cu dos persona a bin for di un hotzone, Miami pa Aruba. 

HOTZONE

Manera ta conoci, prome cu a habri frontera pa Merca, a anuncia un control rigido, cu ta encera entre otro cu pasaheronan di 24 estado Mericano cu ta considera como hotzone (estadonan cu no tin e virus bou di control), nan mester haci un test prome cu nan biaha pa Aruba y post e resultado di e test aki riba website di Aruba. Tanten cu esey no sosode, nan no por subi avion y biaha pa nos isla. Den e caso aki Miami ta un di e hotzone nan aki, pues ta mirando kico por a pasa cu toch un persona a yega Aruba di e zona aki y a test positivo. Esaki ta e glitch cu e mandatario ta referi na dje. 

CONTROL 

 “Pesey nos a bisa tambe cu na principio, nos no kier hopi bishitante ainda. Nos tin drempels hopi alto pa e cantidad di bishitante cu nos haya pa nos maneha. Si tin cosnan cu no ta bay bon, pa nos corigi nan” Wever Croes a bisa e portal aki. E mandatario no a desmenti cu tin posibilidad cu por cambia cierto procedura si tin mester.