Tres turista a test positivo pa COVID-19 na Aruba

ORANJESTAD - Aruba a conoce tres caso positivo mas di COVID-19 diabierna segun DVG. Tur tres ta turista cu a yega afor di Merca. E control y testnan cu ta wordo haci na Aeropuerto ta sigui duna resultado efectivo segun DVG. Awe Aruba pues ta regista 3 caso mas di Covid-19 na Aeropuerto. Tur tres persona cu a test positivo no ta residente di Pais Aruba y a yega nos isla procedente di Merca. Tur turista cu test positivo lo bay den isolacion na un localidad asigna caminda e lo ricibi e servicio nesesario y lo wordo monitoria. Si e turista a biaha cu familiares, esakinan lo bay den cuarentena segun protocol.