Directiva di SMOA lo retira pero di forma responsabel

ORANJESTAD – Den un carta fecha diabierna 17 di juli 2020, y dirigi na Obispado di Willemstad y e comision di Mayor di Colegio Arubano OCCA, presidente di SMOA/SVOA a bisa cu nan (directiva di SMOA) ta dispuesto pa retira di nan funcion entrante 1 di september 2020, contal cu tur cos bay di un forma di bon gobernacion, pues di un forma responsible. Den un prome reaccion pa noticiacla.com e presidente di SMOA Robert Croes II, a bisa e portal aki diabierna mainta cu lo ta iresponsablemente retira sin mas, awor, sin haci un traspaso responsabel, mirando tur cos cu ta ‘den wega’. Pesey a pone e fecha di 1 di September proximo, y ta spera cu pa 1 di augustus, tin candidatonan nobo cu por wordo ‘ingewerkt’. Pues mientras cu ta dispuesto pa retira, no por haci esaki ‘per direct’ manera cu ta wordo solicita. Pues despues di varios carta di varios instancia, pidiendo retiro di e directiva, e directiva a dicidi cu ta bay cumpli aunke nan a bisa repetidamente cu nan no ta wak pakico nan tin cu retira pasobra nan ta funcionando bon. Y ta duna varios motibo den varios carta di esaki. E retiro awor sinembargo, lo tin cu sosode responsablemente, conforme good governance, y e ora nan no tin problema pa cumpli cu e peticion haci na nan. Lesa e carta completo AKI.