No tin fecha pa keda cla cu tratamento di presupuesto 2015

ORANJESTAD - No mester spera encuentro entre mandatarionan di Aruba y Hulanda por lo pronto riba e asunto di presupuesto 2015. Mes momento premier Mike Eman a informa NoticiaCla.com cu Aruba no ta laga los di e pensamento cu e mes por anda cu su asuntonan financiero. Y den e cuadro aki, a bai di acuerdo cu Hulanda pa haya otro ‘half way’. Eman awe mainta a sigui bisa cu riba nivel tecnico, lo cuminsa papia cu otro pa resolve e asunto di presupuesto, awor cu aña a bolter. Segun Eman, Aruba a palabra cu e tin cu concepto di un fiscal council of un begrotings kamer, mientras cu Hulanda tin e concepto di CFT manera Corsou y St Maarten. “Nos tur dos a palabra cu un mente habri lo laga nos tecniconan wak kico ta e opcionnan cu ta duna comfort na un banda na Reino Hulandes y na otro banda ta duna e sentido di reconocemento na e hecho cu Aruba semper a maneha su asuntonan di finanzas publico”.

Mientrastanto no tin ningun reunion entre mandatarionan mes pa discuti e tema aki. Esey no ta kita afor cu e dialogo entre partidonan ta continua. “Pero no tin un fecha stipula pa yega na un final. Esey no” Eman a sigui bisa.