Hulanda no a tene cuenta cu puntonan cu pa Aruba ta fundamental y crucial

ORANJESTAD /DEN HAAG – E proposicion cu Hulanda a manda pa Aruba diaranson, riba e dos conceptonan di ley, basa riba loke Aruba a ‘delibera’ ariba tur e dianan aki cu Hulanda, no a haya mucho oido di Hulanda. Asina prome minister di Aruba Evelyn Wever a conclui diahuebs durante un conferencia di prensa. Segun Wever, Hulanda no tabata por a of nan no a tene cuenta cu e puntonan cu pa Aruba ta mas fundamental y crucial pa yega na un consensus. 

CAMINDA AWOR

Mirando cu riba e nivel di ambtenaar, no tin e espacio pa cambionan cu Aruba kier, Aruba a dicidi pa escala esaki y continua cu un dialogo y negosacion y a presenta e contra propuesta awe (diahuebs) na secretario di estado Raymond Knops, cu e peticion pa sigui riba e nivel aki. “Nos no a logra haci esaki prome cu 11’or. Nos a indica na nan si cu nos ta ‘bezig’, y nos no ta full cla ainda” Wever a sigui bisa. Ta spera den e siguiente dianan aki un contesta y pa por sigui e caminda di dialogo y purba di yega na otro. 

TEMANAN PA HAYA CLARIDAD

Mirando e embergadura, tin cosnan bon den e propuesta di Hulanda, y tin cosnan cu ta hopi dificil pa acepta, mirando e embergadura pa cual a pidi mas tempo pa yega na otro kico tin riba mesa. Tin algun punto cu pa gobierno di Aruba mes no ta mucho cla ainda kico ta loke ta wordo pidi di nos. “Na momento cu bo bay di acuerdo cu algo cu bo no ta duidelijk kico e ta, mi ta garantisa cu ta bin problema den futuro” Wever a bisa. E temanan cu mester mas claridad ta e.o. edad di pensioen, unda cu kier subi esaki sin haci un estudio. Un otro tema ta di dolarisacion unda cu si tin un estudio haci, y a conclui cu no ta den beneficio di Aruba. Tambe tin e tema di shareholding den companianan estatal, cu kier compronde miho. Y e landspakket no a tene cuenta cu full e plan di reforma nacional di pais Aruba. 

ENTIDAD

Aruba kier revisa e intencion di e entidad, y e autoridad cu e ta haya, referente principio di democracia. Tambe si bay di acuerdo cu e entidad, e tareanan cu e ehecuta, ta di acuerdo cu e maneho y den consulta cu e minister na e momento ey riba e diferente tema, y pa parlamento tene su rol.