Minister Oduber: Problema no ta placa sino con pa organisa Calypso y Roadmarch

ORANJESTAD – Fundacion SMAC, Musica y Gruponan Uni mester haya otro riba e aspecto di organisacion di Calypso y Roadmarch contest pa mayan merdia 12'or. Esaki ta e punto riba cual partidonan a reuni casi 3 ora awe cu minister di Cultura Otmar Oduber. E problema no ta ken ta organisa e evento, sino con esaki ta sosode. Segun e mandatario, tin diferencia di opinion, cu mester wordo aclarea internamente. Mientra cu e mandatario a sigura cu e reunion a caba den bon ambiente, e no tabata un reunion facil. Y esei tambe a pone cu e reunion a dura asina largo. Contrario na pensamentonan anterior, ningun momento e aspecto di placa tabata un punto den e reunion, segun e mandatario su declaracion na prensa despues di e reunion di awe merdia.

E mandatario a confirma cu tabatin varios asunto cu a wordo discuti y aclarea tambe, y e unico asunto cu ta keda pendiente pa resolve, ta e aspecto di Calypso y Roadmarch. E mandatario a mustra tambe cu pa loke ta su intervencion, esaki lo continua tanten cu ta necesario. “Si esey ta nifica cu mi tin cu yama un of mas reunion, mi lo hacie. Mi ta keda esun responsabel pa e aspecto di cultura” Oduber a sigura NoticiaCla.com awe merdia. E mandatario a mustra cu Enbes di laga e baca hoga, e ta dicidi di drenta den e pos y saca e baca, prome cu esaki mester hoga. Como tal e la opta pa yama e reunion di awe merdia, y pone partidonan hunto pa kita tur diferencia cu por tin.