Despues di diabierna por divulga interes pa cumpra refineria

ORANJESTAD - Despues di diabierna awor, gobierno di Aruba lo por divulga interes pa cumpra refineria. Esaki pasobra diabierna ta termina e momento pa companianan expresa nan interes den e refineria. Asina gobierno a bisa den un comunicado e siman aki. Premier Evelyn Wever-Croes ta optimista pa cu e interes pa e refineria. Aparentemente tin varios compania renombra den e area di petroleo a entrega un oferta pa opera e refineria. 

Manera ta conoci, dia 8 di juni Gobierno a publica un anuncio publico pa tur esnan cu por tin interes den opera e refineria di Aruba, expresa nan interes. E procedura aki ta wordo referi na dje como “Request Expression of Interest REOI 1”. 

Banda di esey a haci un invitacion publico tambe pa tur esnan cu kier desaroya un otro actividad riba e tereno di e refineria, den un asina yama “Request Expression of Interest REOI 2”. Y pa esaki tambe tin hopi interes.  Kico e interes ta exactamente lo por wordo divulga despues di diabierna. Tur interesado a haya 6 siman pa expresa nan interes. E periodo di 6 siman ta vence diabierna dia 17 di juli. Gobierno di Aruba a laga sa cu nan ta hopi optimista cu e desaroyonan aki, cu lo genera desaroyo economico den nos pais y crea cupo di empleo asina necesario den nos pais.