Wever: Hulanda lo ta di acuerdo pa Aruba tin representacion den entidad

ORANJESTAD – Aruba lo a haya ‘toezegging’ pa forma parti di e asina yama Caribisch Hervormings Entiteit (CHE), como un di e tres miembronan. Asina prome minister Evelyn Wever Croes a revela prome na e gremio y sindicatonan presente durante un presentacion diaranson mainta, y despues na e portal aki. “Si, den negosacionan nan (lesa:Hulanda) a indica cu por amplia, inclui den e entidad, personanan local tambe” Wever a bisa e portal aki despues. E info, por cierto ta e director di directie financien (Derrick Werleman) a fluister na dje durante e session. Wever a bisa e portal aki cu e mes no ta den e negosacion pero cada bez ta haya 'update' di e situacion. Pa diahuebs Hulanda kier un decision di Aruba. 

HULANDA

Mientrastanto e portal aki a haya confirma diaranson mainta for di su fuentenan cerca di e negosacionan cu enberdad esnan cu ta bay traha pa e entidad aki, ‘por ta tanto di e area di Caribe como di Hulanda’. Mas aleu, a bolbe reitera e meta di e entidad aki, unda cu ta papia di ‘un entidad di Hulanda, cu ta otorga fiansa  y ta inicia reforma y ta sostene e ehecucion di dicho reforma’. Ademas a sigura cu e entidad aki ta haya su propio directiva. Y ta e constelacion di e directiva ta unda cu awor ta mustra cu Aruba lo haya participacion aden. Algo cu anteriormente no tabata e caso segun Aruba, aunke cu Hulanda su secretario di Estado Raymond Knops a bisa si den e conferencia di prensa siman pasa cu esaki tabata un posibilidad.