FPNA ta bay keha parlamentario pa violacion di secrecia

ORANJESTAD – Tin indicacion cu parlamentario pa partido POR, Alan Howell lo a incrimina su mes door di divulga informacion adkeri durante un reunion ‘cera’ di comision fiho di medio ambiente y infrastructura y Fundacion Parke Nacional Arikok (FPNA), y despues publica contenido di esaki na medionan di comunicacion. E portal aki a compronde di e CEO di FPNA Norman Kuiperi, cu debi na esaki FPNA lo keha e parlamentario na presidente di Parlamento pa loke el a haci. E portal aki a compronde cu e acto aki segun regla di Parlamento no ta permissible y hasta por ta castigabel pa ley.  

E REUNION

E reunion encuestion ta esun cu Howell tabatin recientemente cu e fundacion cu ta maneha Parke Arikok. Howell ta presidi e comision permantente di medio ambiente y den cuadro di esaki a atende esaki. Despues di e reunion aki, el a bay prensa y splica entre otro cu e la logra cu FPNA y cu Aruba Offroad Foundation (AOF) ta bay sinta na mesa bek cu FPNA pa resolve nan posibel diferencia. E portal aki a compronde cu esaki no tabata e tema y cu ningun momento esaki a bin na ordo. Ta mustra cu Howell lo ta tumando parti pa un partido, y cu e intencion aki e lo a saca e informacion. Ademas e siman aki AOF ta hibando FPNA corte pa e.o. stroba nan di drenta e parke. Y un actuacion asina di Howell por te hasta hinca partidonan den problema dilanti huez. 

PASADO

Den pasado na Corsou tin un ex parlamentario (Amerigo Thode) cu tambe a haya su mes mal sirbi (caso contra dje) pasobra el a usa informacion adkeri durante un reunion ‘cera’, y a bay prensa cu ne sin cu esaki ta posibel. Algo asina tambe ta parse di a sosode aworaki pa cual e parlamentario di POR, por haye den problema legal serio si esnan envolvi dicidi di actua contra dje. E ta un caso ‘sensitivo’ cu por tin un desaroyo negativo pa tur partido, si esaki no keda aclarea.