Carta cu mas di 1800 firma a bay pa gobierno pidiendo retiro di SMOA

ORANJESTAD – Bou di e nomber ‘Union ta Haci Forza, un grupo di persona consistiendo di ex alumno y mayor di Colegio Arubano a manda un carta cu mas di 1800 firma colecta, pa pidi retiro di e directiva di Stichting Middelbaar Onderwijs Aruba (SMOA). Riba e carta fecha 13 di juli 2020, e 5 personanan cu a firma e carta cu tur e peticionan, a dirigi esaki na Minister Presidente Evelyn Wever Croes y minister di enseñansa Rudy Lampe. 

META

Segun e grupo, e meta final di e firmantenan ta pa ‘e directiva di SMOA retira’. Den e peticion, tin un lista largo di puntonan di dolor cu ta varia di ‘asuntonan no mucho cla y dudoso’., te ‘mas caso unda cu e directiva ta carece di transparencia y of falta di respet pa cu e alumnonan, mayor y docente’. 

FACEBOOK

E peticion a wordo inicia ‘online’ cu despues a sigui usando e plataforma di Facebook, y tabatin un opcion pa por keda anonimo of no. A scohe pa un separacion, esta un peticion pa mayornan y un peticion pa ex colegiano (ex mayor, ex alumno, docente y ex docente y tur otro hende cu ta preocupa pa cu e scol). E puntonan di dolor ta contene email ricibi, mensahe di Facebook, whatsapp, primordialmente di mayornan preocupa. 

RESULTADO

E resultado te cu dialuna mainta 6’or tabata cu a colecta 531 firma di mayornan, y 1308 di ex colegiano. E intencion tabata pa haya atencion di e gobernantenan y pa e gobernantenan consecuentemente ‘hala atencion di e directiva di SMOA. 

OBISPADO

Tabata recien ainda cu hasta Obispo Luis Secco mes a manda un carta pa SMOA su directiva unda cu e ta haci un di tres apelacion na e directiva pa esaki retira. Pero mescos cu otro biahanan, directiva a manda un carta bek pa Obispo, cu e contesta cu nan no ta wak motibo pa retira y ta mas bien cuestiona e actitud di Obispo den esaki y a invit’e atrobe pa un combersacion cu e directiva. No ta conoci si Obispo ta acepta esaki.  Pa loke ta e carta actual, por lesa esaki AKI.