SMAC- Carnaval di Aruba den 2021 definitivamente no ta na januari-februari

SMAC- Carnaval di Aruba den 2021 definitivamente no ta na januari-februari

Posted on 07/13/2020 5:45 pm AST | Updated on 07/13/2020 5:50 pm AST

ORANJESTAD –  No ta sigur ainda cu carnaval ta sigui na 2021 na Aruba. Loke si ta definitivo, ta cu si e sigui, e fecha lo no ta entre januari y februari di 2021. Asina presidente di e fundacion cu ta maneha Carnaval na Aruba, SMAC, Jason Brown a confirma pa Noticiacla dialuna. E enfasis ta riba e hecho si e carnaval ta sigui of no. E decision ey no a cay ainda. Pero si carnaval na Aruba sigui, e intencion ta pa haci esaki den zomer 2021. Na tanto Corsou como St Maarten si, decision si tin carnaval, ta tuma. 

CORSOU Y ST MAARTEN

Noticiacla.com por confirma pues cu tanto Corsou como St Maarten si a confirma cu ey lo tin carnaval, y segun fechanan regular. Gruponan di carnaval a bisa diadomingo cu nan ta cla pa Carnaval 2021 por ranca sali, segun e portal di Corsou Extra Curacao. E decision ey a cai diadomongo trai merdia den reunion ku AGKK (Asosacion di carnaval) a tene cu su miembronan, esta lidernan di gruponan di carnaval. Pa loke ta St Maarten, riba e pagina oficial di carnaval di e isla, esaki ta confirma tambe, completamente cu programa y fecha.  

CAMBIO

Tabata algun siman atras cu e portal aki a raporta riba e tema aki, cu a causa un ‘conmocion’ mei mei di crisis di COVID-19, esta cu carnaval ta cambia di fecha. Y porta debi netamente na e crisis actual, e tema no a haya suficiente atencion. Sinembargo SMAC si a keda reuni cu gruponan di carnaval di Aruba. Y awor e decision ta definitivo, cu si carnaval sigui, e lo ta riba otro fecha. Ora cu a anuncia e cambio, esnan cu si a capta e noticia, sorpresivamente a reacciona hopi positivo, indicando cu awor carnaval no ta un prioridad, sino seguridad y cu si pone mas laat, ta te hasta miho. Otronan a te hasta sugeri pa cancela henter e aña y bin bek duro e siguiente aña. E aña aki tur actividad publico a keda cancela, y ta premira cu esaki lo por ta e situacion atrobe na 2021. No asina tanto pa motibo di e virus, sino e situacion financiero economico cu e virus ta laga atras. 

 

  • Powered by SETAR