Aruba dispuesto pa duna CAFt mas poder via un LAFt ‘Plus’

ORANJESTAD – Gobierno di Aruba ta dispuesto pa duna e colegio di supervision financiero di Aruba (CAFt) mas poder, cambiando e ley actual (LAFt) den un asina yama LAFt ‘Plus’. Asina prome minister Evelyn Wever Croes a bisa den un entrevista na noticiacla diadomingo anochi. E Landsverordening Aruba Financieel Toezicht (LAFt) ta un ley local riba cual CAFt ta funciona. Cu un LAFt Plus, posiblemente Wever ta spera cu por evita cu Hulanda ta cambia esaki pa un Rijkswet Financieel Toezicht (RFT ), manera cu Corsou y St Maarten tin actualmente. Si ta logra evita e RFT, of kico e tin cu bira, tin cu wak ainda. 

NEGOSACION 

Den negosacion ta ainda cua tipo di ley ta bay haci e supervision aki. “Si ta pa nos, LAFT of hasta hinca mas cos den e LAft. Nos ta yame e ora un LAFT plus. Cu ta duna mane mas medida di supervision” Wever a bisa. E ta mustra riba e situacion prome cu COVID-19 unda cu Hulanda no tabata presta Aruba placa, mientras cu tabatin LAFT. Si tur cos bay bon aworaki segun Wever, Hulanda lo a presta Aruba mas di 500 miyon florin cu ta mas di mei biyon florin cu ta hopi placa.”Anto nan kier mas supervision, nan kier mas grip, nan kier controla esaki miho, ta redelijk” Wever a bisa. E pregunta ta bira, con esaki lo tin cu sosode. 

MEDIDA MAS PISA DI SUPERVISION 

Mester bay wak kico e ‘extra maatregelen y verscherpte toezicht cu Hulanda ta propone. “Y e ora ta bin e discussion si e ta keda den un landsverordening of e ta bay den un rijkswet. Esey ta cosnan den deliberacion aworaki” Wever a sigui bisa. Si ta pa Aruba, lo keda den un LAFT verordening. “Si ta esey ta e unico cos cu ta dividi nos, si esey ta e unico cos cu ta keda falta pa nos yega na e placa, mi no ta kere cu e ta un issue asina grandi”. Wever a bisa. Despues e la coregi su mes, bisando. “E ta un issue hopi grandi, pero den e scala di prioridadnan, e scala di necesidad, e ora mi ta kere cu nos por sali afo basta facil” Wever a bisa. 

PREFERA LAFT MAS PISA 

Riba e pregunta cu si ta prefera un landsverordening riba un rijskwet, Wever a bisa cu tin forma con pa duna un landsverordening mas peso pa asina tin menos chens cu e ta wordo cambia ‘zomaar’, pasobra esey ta e preocupacion di Hulanda segun Wever. Den e entrevista, e periodista Tito Laclé a puntra con ta haci e ora pa evita cu historia por ripiti unda cu Parlamento ta haya chens pa bolbe ‘mete’ y adapta e ley cu ta loke a causa e problema na prome lugar. Wever a bisa cu e ta prefera pa e keda un landsverordening, y aki dos pa tres dia lo haya sa esey. 

METEMENTO DI PARLAMENTO?

Segun Wever, tur cambio di ley tin cu pasa Parlamento. Si ta un landsverordening, y si ta un rijkswet, e ta cana un otro caminda, pero Parlamento tin su tarea den esaki tambe. “Esey no ta un cos cu ami tin pensa di kita. Y mi no ta bay permiti ningun hende kita esey tampoco. E primaat van de wetgever, kier men e autoridad cu Parlamento tin, ta algo riba tur cos” Wever a sigui bisa. “Bo no por mishi cu esey y Hulanda ta realisa esey tambe” e prome mandatario a sigui bisa. 

TRABOU DI CAFT

Wever ta kere cu CAFt ta haciendo miho trabou cu antes, (durante gabinete anterior:red). “Nan ta mas streng pero sinceramente, nan ta teniendo cuenta cu hopi cos”. E mandatario mes momento ta contento cu durante e entrevista di noticiacla cu secretario di estado Raymond Knops,  a duna CAFt un elogio pa e funcionamento di e colegio. Y Wever ta convenci cu CAFt lo sigui cu e supervision na Aruba por lo pronto.