Cuater Parlamento di Reino cu temanan delicado e siman aki na Aruba

ORANJESTAD – E crisis politico di 2014 lo ta un di e temanan e siman aki durante e reunionnan parlamentario di paisnan den Reino Hulandes, conoci como IPKO (Inter Parlamentaire Koninkrijks Overleg)  na Aruba. Un total di 36 parlamentario lo representa e 4 paisnan, y discuti cu otro pa 4 dia largo riba varios tema. Den combersacion cu presidente di Parlamento di Aruba, Marisol Lopez Tromp, e la confirma na NoticiaCla.com cu ‘banda di e temanan comun, e delegacionnan a dicidi cu lo bai papia habri cu otro riba (entre otro) temanan cu a surgi den 2014 y cu a hasi e relacionnan entre e paisnan den reino politicamente tenso'.

Entre e topiconan riba agenda cu sigur a hala atencion, tin e geschillenregeling, discuti riba e di dos dia, esta diaranson, sigui pa e reglamento di orden di gobernador (uso di articulo 15 y 21 cu a causa e crisis entre Hulanda y Aruba), y finalmente e screening di candidatonan pa bira minister, y con pa miho maneha esaki. Eseynan lo ta riba diahuebs. Entre nan, lo tin otro topiconan di interes. Pero esunnan menciona, ta esnan cu ta hala atencion sigur.

Den combersacion cu lider di fraccion di MEP, Evelyn Wever, e ta comparti e opinion cu ta trata di temanan delicado. Mes momento Wever ta lamenta cu fraccion di AVP ta scohe pa sigui busca confrontacion cu Hulanda, awor tambe den IPKO. “Dia mi biaha pa Hulanda na september aña pasa, mi a palabra cu politiconan di Hulanda, cu nan lo pasa man na nan curason y no impone tur medida, pero si AVP sigui busca caminda di confrontacion, nos ta leew di cas. Wever a bisa. Lider di fraccion di AVP, Rene Herde tambe tabatin su comentario "   Si miembronan di Parlamentonan di e cuatro paisnan ta bini hunto, bo no por keda sin atende e asuntonan urgente. Pesey nan ta riba agenda y lo wordo discuti ampliamente, pero cu e meta pa siña di pasado, yega na palabracionnan nobo y mehora futuro". Presidente di parlamento di Aruba mientrastanto ta confirma cu e puntonan ‘regular’ di agenda tabata conoci, e biaha aki tin varios hot topic di aña 2014 a bin acerca riba agenda. Tur segun Lopez, ta importante ya cu ‘ nan tin consecuencia tambe pa futuro’. Lesa e agenda completo di e reunionnan aki). Foto di archivo ta di un di e reunionan pero na Hulanda.