Reaccion AVP: Kier mas splicacion di Gobierno riba e plan cu Hulanda a presenta

ORANJESTAD – “Nos ta en espera di splicacion di Gobierno, como cu Secretario di Estado Knops a indica na su parlamento, cu Aruba lo a pidi algun dia extra pa bin bende e idea”. Esaki ta parti di e reaccion official di partido politico di oposicion AVP, despues di a tuma nota di e proposicion di Hulanda na Aruba referente e dos ley di Reino. Segun AVP, ‘eigenlijk nada no a cambia compara cu diahuebs ultimo ora cu Gobierno a bin Parlamento: dos rijkswet ta keda riba mesa’. Segun e partido berde, esun di supervision financiero (ya sea bou di RFT of bou di Rijkswet apart) lo no tabata necesario si LAFT tabata na ordo; como tambe esun di e entidad di reforma cu ta cambia e orden constitucional di Reino por completo. “Un entidad hulandes fungiendo bou ley Hulandes lo haña autoridad como organo di Reino pa tuma decisionan cu ta regarda maneho di e paisnan. E fundeshi di e ultimo aki ta totalmente robes” e partido a finalisa bisando.