Wever: No por garantisa salario pa ambtenaarnan pa otro luna

ORANJESTAD – No ta sigur cu gobierno, den e situacion actual, por paga salario completo e luna aki di ambtenaarnan, y sigur no otro luna. “Mi no por duna e garantia ey aworaki, Tito. Sorry!”. Asina prome minister Evelyn Wever a contesta den e entrevista di noticiacla diadomingo anochi. E pregunta tabata cu si e riba e ambtenaarnan cu tabata wak e programa, por keda trankil cu pa fin di e luna aki y otro luna e lo haya su salario paga. Esaki den cuadro cu Hulanda y Aruba no a yega na un acuerdo siman pasa diabierna, y cu tanten cu no tin acuerdo, Aruba no ta haya e placa necesario. 

NO TIN GARANTIA

“Mi no por!” e mandatario a sigui bisa. E ta bisa cu e ‘buffer’ cu gobierno tin ta surpasa fin di e luna aki. E no ta yega mucho mas leu. “Nos tin cu tene cuenta cu ora cu Hulandesnan baha cu reces, nan tey bek te September. “ Kier men e buffer te augustus (cu Aruba a declara cu tin ainda) no ta bay yuda nos cu nada, si ta september nos ta bin bek cu otro”. Y Wever a admiti cu no a tene cuenta cu e placa cu mester paga na prestamo estudiantil pa e studiantenan cu ta biaha pa exterior awor. “Aplicacion pa studie lening a aumenta, mas cu nos a tene cuenta cu ne, y nos no kier stroba nos hobenan pa bay busca nan futuro den exterior”, Wever a sigui bisa. “Nos no ta sinta riba un bulto di placa. Nos tin un timeframe hopi cortico pa nos ta sigur.

LOKE SI WEVER POR GARANTISA

Bisando tur esey, Wever a sigura si cu tur empleado publico, di sector priva, cu ta depende di FASE, cu ta haciendo tur esfuerso pa nan no mester sinti e consecuencianan di e situacion cu Aruba ta aden. Ta atendiendo e situacion cu Hulanda pa asina evita cu e ambtenaar tin cu preocupa si e ta haya su placa, cu e trahado priva por aplica pa subsidio pa salario pa nan no wordo afecta. “Esey mi por garantisa. Pero e garantia cu e placa tey pa paga salario, ami no por duna aworaki” Wever a bisa. Probablemente pa fin di luna aki si, porta no completamente pero probablemente no mucho mas cu esey”. 

PLACA

E problema ta cu Hulanda lo mester a aproba e placa extra for di siman pasa, pero a opta pa pospone e tratamento debi cu no tur informacion tabata aden. Esey a pone cu e schedule di pago a cay atras, y ta te diabierna ultimo a trata e tema. Pero aki tambe a surgi un problema, pasobra no a yega na un acuerdo entre Aruba y Hulanda, ainda. Y tanten no tin acuerdo, no tin placa mas. Y e buffer cu gobierno (y Hulanda) a bisa cu tin te fin di luna di augustus, probablemente toch lo no yega. Ta spera cu e siman aki keda cla cu e asunto y cu e ora mesora placa lo keda deposita pa e problema di salario keda soluciona.