Wever: Contrario na declaracion di Knops, Aruba tambe a rechasa proposicion

ORANJESTAD – Prome minister Evelyn Wever ta considera e declaracion di secretario di estado Hulandes Raymond Knops den su carta na Tweede Kamer, riba Aruba como un ‘misunderstanding’. Asina el a bisa den e entrevista cu noticiacla diadomingo anochi. Knops a bisa den un carta pa Tweede Kamer, cu mientras cu Corsou y St Maarten a ‘rechasa’ e proposicion di Hulanda, Aruba simplemente a pidi mas tempo pa haya un draagvlak. Pero no ta bisa cu Aruba tambe a rechasa. Wever a refuta esaki formalmente den e entrevista, sigurando e portal aki cu Aruba tambe a rechasa ambos proposicion.

DOLOR DI CABEZ

“Tito, si mi no a rechasa, lo mi a bin cu e placa caba y lo mi no tin tanto dolor di cabez manera mi tin awe” Wever a contesta e periodista Tito Laclé den e entrevista. E mandatario a bisa cu e lo tuma contacto cu Hulanda riba e punto aki pa nan corigi e eror aki. “Nos tur tres a rechasa e rijkswetnan riba mesa” Wever a sigura Laclé den e entrevista. E ta clarifica si despues cu ta un rijkswet pa Corsou y St Maarten (nan tin un caba pa supervision), mientras cu pa Aruba nan ta dos, esta esun di entidad nobo y supervision financiero. “Nos a rechase, nos a splica cu nos no por bay di acuerdo cu nan manera cu nan ta. Esey ta loke mi a bisa. Niet zo” Wever a sigui bisa. “Mi no a djis bisa nee. Mi a bisa niet zo. Pasobra nos mester di e cen, pero esey no ta e motibo pa no cana e caminda huridicamente cu nos mester cana” Wever a sigui bisa. Esaki ta parti di e entrevista. Keda pendiente pa mas parti di entrevista den otro relatonan den curso di dia.