Wever: No a bay di acuerdo cu ningun di dos RFT cu Hulanda a presenta

ORANJESTAD – Aruba no a bay di acuerdo cu e dos ley di Reino cu Hulanda a presenta pa Aruba acepta  , esta pa drenta den e Ley di Reino (RFT) pa supervision financiero, y pa e entidad nobo controla placa di fiansa pa e.o. Aruba. “Mi no tabatin e machtiging pa haci esey” Evelyn Wever Croes a bisa e portal aki diabierna atardi for di Den Haag, Hulanda. Pero manera indica den raportahenan inicial di awe diabierna, e negosacionan a inicia caba. Tanto riba e entidad nobo y e ley di Reino. 

NEGOSACION

Segun Wever, pa loke ta entidad, e punto di negosacion ta kico Aruba ta dispuesto pa tuma over y kico no di esaki. Pa loke ta e RFT, Wever a sigura cu esaki ta ‘for di mesa caba’. Por lo menos den e forma cu el a keda presenta na Aruba. “Nos a logra caba cu e no ta bira un RFT, pues unda cu Aruba ta bay bou di e Rijkswet di Corsou y St Maarten.

BOLBE ARUBA DIASABRA

Wever mes ta bolbe Aruba diasabra, pero ta laga su hendenan tanto na Aruba como Hulanda sigui traha ariba, y for di Aruba e lo atende e asunto. Segun Wever a sigui bisa e portal, e mester ta na Aruba pa sigui maneha e crisis grandi di COVID-19. Y esaki ta comprendibel si tene na cuenta cu diabierna (awe) Aruba a habri frontera cu Merca, e pais porta mas infecta y afecta cu e virus mundial.