Knops: Ta spera cu pa otro siman por cera acuerdo cu Aruba

DEN HAAG – “Nos no a haya otro ainda. Pero durante e proximo dianan nos ta bay usa pa pone e ‘puntjes op de i’, pa wak con nos por yega na un acuerdo. Y ora cu e acuerdo tey, e ora nos ta pone fiansanan nobo na disposicion (di Aruba)” Knops a bisa e portal di noticia aki den un entrevista exclusivo pa Aruba diabierna mainta. E mandatario Hulandes ta confirma asina cu partidonan no a haya otro manera lo a spera diabierna mainta durante e reunion di conseho di minister di Reino. Algo cu premier Wever tambe a confirma na e portal aki. 

MAS TEMPO

Aruba a pidi mas tempo pa por a haya un ‘draagvlak’ riba e condicionan impone pa Hulanda. Esey kier men cu Aruba no ta haya placa ainda, sino mas bien posiblemente pa otro siman. E hecho cu tin receso, no ta stroba e gobernantenan pa sigiu dialoga riba e tema. 

KICO A ACORDA Y KICO NO

Mientrastanto ta conoci cu no tabatin acuerdonan yega na dje, Knops a duna su version na e portal aki di kico tur a sosode. Loke a papia ariba diabierna, tabata e proposicion di gobierno di Hulanda, cu ta contene un pakete di e.o. fiansa, pero tambe un entidad cu lo haci inversion pa e.o. Aruba, procedente di e pagado di impuesto di Hulanda. Tabatin condicion mara na dje, manera un ley di Reino, (RFT). “E motibo pakico Aruba mester bay di acuerdo cu e pakete, ta pasobra ta papia di sumanan grandi” Knops a bisa. 

ACUERDO POSIBEL OTRO SIMAN 

“Nos lo wak si den curso di otro siman, nos por yega na un acuerdo, y despues nos por bay cu recess” Knops a sigui bisa. “Tanten cu esaki no ta regla, Aruba no ta haya placa. Pero Aruba tin tempo cu e fiansanan anterior, cu e no ta haya problema. Nos ta vigila esaki hopi di cerca. Pero asina cu nos yega na un acuerdo, esey lo no conduci na problema, y si nos yega na un acuerdo, esey lo conduci mesora na pago di e placa” Knops a sigura e portal aki. 

PAKICO TANTO SECRECIA

Mientras cu e ta compronde e conmocion pa e hecho cu Hulanda no a permiti Aruba revela e documetacion manda dialuna, e tabatin su motibo. Asina Knops a bisa durante e entrevista exclusivo. “E procedura na RMR (Rijksministerraad) ta asina cu e documentonan cu ta riba agenda, prome cu nan wordo discuti, no ta publico” Knops a bisa. Pero e ta conciente cu tin biaha documentonan ta ‘lek’, pa cual nan no tabata mucho contento. Pero awor a dicidi cu ta haci e documentonan publico diabierna. “No tabatin nada misterioso, pero simplemente palabracion normal di RMR. Esey ta algo otro cu si nan mester keda secreto semper”. Por lesa tur e documentonan cu awor ta liber, AKI.