Aruba a ricibi su prome turistanan Mericano bek despues di 4 luna

ORANJESTAD – Despues di 4 luna di ausencia, e prome avion comercialnan di Merca a bolbe Aruba diabierna merdia. Mirando e importancia di e mercado aki, esnan responsabel pa turismo na Aruba a bay ‘all out’, completo cu steelband, bailarinan carnavalesco y regalitos na salida di aeropuerto. Por a nota e ‘normal nobo’ mesora, unda cu tur hende, tanto trahado como turista tabatin nan mondkapje bisti. Turistanan cu sonrisa riba nan cara, tabata mustra e alegria di ta bek na Aruba. Hopi di nan sinembargo, asina cu nan sali for di aeropuerto, a opta pa kita nan mondkapje. Un total di 5 avion di Merca a percura pa e euphoria aki, siendo e mercado principal di Aruba. Buelonan di Europa y Caribe tambe a aterisa, pero no tabatin e mesun impacto. Hopi hende tabata cu lagrima na wowo, ora cu nan a mira aeropuerto ‘biba’ atrobe. Autonan di taxi, bus, hende. Un alegria pa por a mira nos industria bek, despues di 4 luna di pena, debi na COVID-19. E cantidad spera tabata casi 1000 pasahero, mientras cu e grupo mas grandi ta wordo spera diasabra awor. Na tur ta spera 4000 pasahero for di Merca e fin di siman aki.