Premier Wever: Nos no a keda cla ainda pero tin apertura

DEN HAAG – Gobierno di Aruba no a keda cla cu Hulanda ainda pa e fiansa cu tin cu sigui, pero tin apertura. Asina e prome minister di Aruba Evelyn Wever Croes a bisa despues di e reunion di Conseho di Minister (RMR). Despues di Conseho di Minister di Reino Wever-Croes a duna di conoce cu Aruba y Hulanda ta bay den dialogo pa yega na otro riba e fiansa di 3e tranche. Den e proceso aki e puntonan di bista di Aruba lo wordo treci padilanti pa tene cuenta cu ne. 

ARUBA NO POR ACEPTA

Aruba no por acepta e condicionnan cu a wordo poni comienso di e siman aki pasobra no a delibera cu Aruba riba dje. Aruba ta compronde cu Hulanda kier bin cu un entidad y cu mas supervision awor cu nan a presta Aruba 200 miyon florin caba y ta bay presta Aruba 200 miyon mas. Pero e forma con mester yega na e entidad y na mas supervision mester bay den deliberacion y dialogo.

POR PUBLICA DOCUMENTONAN

Aruba a haya e aprobacion pa publica e documentonan pa asina por hiba un debate habri na Aruba. 

BEK DEN DIALOGO

Segun Wever, Aruba y Hulanda ta bay den dialogo pa yega na otro riba e fiansa di 3e tranche riba termino corto. Den esaki Hulanda a indica cu lo kier yuda Aruba pa cu inversionnan den nos pais den enseñansa, salubridad y siguridad. Aki por pensa na algo similar na Fondo di Desaroyo di Aruba. 

Segun Wever, Hulanda a reconoce e maneho financiero hiba na Aruba pa Gabinete Wever-Croes pa mehora e situacion financiero y a indica di lo kier sigui yuda cu fiansa y inversion. E dialogo pa yega na otro a cuminsa mesora. 

Premier Evelyn Wever-Croes ta optimista y tin confiansa cu pronto por sali afo pa Aruba por haya e fiansa. “Nos no a keda cla completamente ainda, pero tin un apertura, tin oportunidad cu no tabata tin prome cu mi a bin Hulanda. Nos ta realisa cu hunto nos mester sali di e crisis aki y mi tin tur confiansa cu nos lo logra”, Wever-Croes a duna di conoce.