SMOA na Obispo: No tin motibo pa e directiva retira

ORANJESTAD – Directiva di SMOA den un carta di tres pagina diahuebs a contesta Obispo Luis Secco, y no ta mustra cu nan lo duna oido na e peticion di Obispo pa retira como directiva. Mas concreto, presidente di e directiva Robert Croes II, ta bisa cu ‘no tin motibo presente pa e directiva retira”. Den e carta,   Croes a sigui repasa punto pa punto y mas bien ta cuestiona Obispado su actitud, y ta mustra di ta sorprendi cu esaki. Pero den e carta, e no ta informa Obispado cu nan lo duna oido na e peticion di retira den 72 ora di tempo. Es mas, kier pa Obispado splica nan punto. 

CRISIS 

Croes ta sigura Obispado cu no tin ningun crisis. Cu esaki tambe ta mustra pues cu como cu no tin crisis, lo no tin necesidad pa retira. Pasobra segun Obispado, e directiva mester retira pasobra tin crisis. Algo pues cu segun e directiva, no tin. Pa loke ta e interes cu e directiva tin, Croes ta sigura cu e interes ta pa tin educacion cualitativo y pa tin bienestar di e alumnonan na pecho. Croes ta sinti cu Obispado a ofende e directiva door di insinua cu e directiva tin interes otro. Mes momento e directiva ta bisa di ta sigur cu no ta e intencion di e Obispado pa ta insultante. RETIRA PA DI TRES BIAHA

Segun Croes, ta straña e directiva cu Obispado ta pidi pa di tres biaha pa e directiva retira, sin reacciona riba e puntonan cu e directiva a menciona den nan carta, y sin cumpli cu e puntonan di bon gobernacion. 

MENASA DI KITA SUBSIDIO

Tambe Croes ta mustra cu e ta sorprendi cu Obispo kier trece e enseñansa na Colegio na peliger door di mishi cu e subsidio, si e directiva no retira. E ta considera esaki como presion sin mester y no ta considera esaki den interes di e alumnonan. Tambe e directiva kier sa di kico ta culpando e directiva, y pa por fabor contesta e preguntanan. Ta mustra cu si no por sigui negosha cu Obispado, lo sigui cu e Archidiosesis. Pa lesa e carta completo, click AKI.