Parlamento via mocion ta urgi Gabinete Wever pa rechasa RFT di Hulanda

ORANJESTAD – Parlamento di Aruba diahuebs mainta a pasa un mocion den forma unanime, cu ta urgi gabinete Wever Croes con pa actua riba e asunto di impasse cu Hulanda. Mester bisa si cu e parlamentario independiente Daphne Lejuez no tabata presente ya cu e ta sufriendo un quebrante di salud. Entre nan, e mocion ta urgi gobierno pa ‘rechasa e Concept Rijkswet Caribische Hervormingsentiteit’, y pa urgi gobierno pa no forma parti di e RFT (Rijkswet Financieel Toezicht). Ademas Parlamento ta urgi gobierno pa ‘entrega un contra propuesta’ na Rijksministerraad (RMR). Y finalmente, ta urgi gobierno pa continua cu un dialogo cu gobierno Hulandes riba e posibilidad pa haya financiamento sin condicion, condicionan cu no ta en pugna cu e leynan local e internacional y cu no tin un impacto negativo socio economico riba e bida di ciudadanonan di Aruba. Ademas ta pidi gobierno pa desaroya un strategia pa recuperacion y desaroyo pa por haya posibilidad di financiamento adicional pa sostene e forma di biba di e pueblo di Aruba. Por lesa e mocion completo AKI.