Condicionan cu Hulanda tin pa Aruba tin puntonan positivo y negativo

ORANJESTAD – Mientras cu hopi hende na Aruba tin problema y te hasta rabia pa e forma con Hulanda lo kier impone cierto condicionan riba Aruba a cambio di placa pa fiansa, tin hopi cu tambe ta positivo pa cu esaki. Esaki mirando cu tin hopi cos positivo tambe cu Hulanda kier haci segun e documentacion cu te ainda ta secreto.  For di gobierno a bin comprende cu tin 18 condicion premira cu Hulanda lo kier impone riba Aruba. Pero e documentonan ta contene informacion cu ta mustra puntonan positivo di cambionan cu lo mester tuma lugar pa Aruba.  

ARUBA

Noticiacla.com a comprende cu den e documentonan e.o. ta inclui cambionan structural cu mester tuma lugar pa cu e tres islanan autonomo di nos Reino. Ta papia di varios ‘landspaketten’, cu ta encera e.o. reforma riba gobernacion y finansas, reforma economico, cuido y enseñansa, y fortificacion di nos estado di derecho. 

IMPUESTO

Noticiacla.com ademas a comprende cu den e documentonan e.o. ta wordo bisa cu entre e medidanan cu e entidad nobo lo evalua pa Aruba, ta figura e expansion di base di impuesto, y ta move di impuesto directo pa indirecto y implementacion di BTW di 12.5%, conforme e proposicion di e departamento di IMF of ABB, conforme e systema di impuesto di Caribe Hulandes. E tema y punto aki a keda confirma pa prome minister Evelyn Wever Croes cu enberdad ta forma parti di e documento en cuestion. Tambe a compronde cu ademas e departamento di impuesto lo bay haya e informacion di e sector bancario. No ta conoci si ta informacion di cliente comercial of priva of tur dos. 

MERCADO LABORAL

E intencion lo ta pa tambe ehecuta un analisis integral di e mercado laboral, tambe riba e leynan laboral y analisa tur cos, pa asina wak si meser desaroya sugerencia y implementa esaki. Ta papia di analisa e posibilidad pa suavisa e ley di  retiro, elimina impedimento pa atrae labor di afo, y mas. 

EDAD DI PENSIOEN

Edad di pensioen tambe ta bin na remarke den e documentonan manera por a compronde. Aki ta papia tambe di aumenta edad di pensioen na 67 aña (66 aña na 2023 y 67 na 2025) y introduci e asina yama middelloon envez di eindloonregeling. Prome minister Evelyn Wever Croes a confirma e punto aki diaranson durante e presentacion na varios stakeholder. 

ENTREPENEURSHIP

Tambe e portal aki a comprende cu den e documentonan e.o. ta wordo bisa cu lo promove e clima di inversion y tambe entrepreneurship. Lo optimalisa e sistema di permiso y e costo di haci negoshi lo wordo reduci, y lo elimina e red tape. 

PERMISO DI ENTRADA

Ademas, lo tin informacion cu lo implementa e Landsverordening Toelating, Uitzetting en Verwijdering pa asina miembronan di famia di ambtenaar di Reino por wordo permiti entrada na Aruba, van rechtswege. Esaki ta un problema specialmente na Aruba caminda ta haci hopi dificil pa nan haya e permisonan di estadia y di trabou.

MEDIO AMBIENTE

NC ta comprende cu ningun caminda den e documentacion asina extenso tin atencion pa nos naturaleza y of nos medio ambiente. Esaki ta lamentabel, como cu por lo menos atencion di Hulanda pa nos problemanan agudo na Aruba, no mag di exclui e thema importante aki pa nos isla!